ഡൽഹി: ആയുധധാരികളായ നക്സലുകളെ രാജ്യത്ത് നിന്ന് തുടച്ചുനീക്കിയെങ്കിലും നക്സലിസത്തിന്റെ ഭീഷണി പൂർണ്ണമായി അവസാനിച്ചിട്ടില്ലെന്ന് പ്രധാനമന്ത്രി നരേന്ദ്ര മോദി. സായുധ നക്സലുകൾ കാടുകളിൽ നിന്ന് അപ്രത്യക്ഷരായെങ്കിലും രാഷ്ട്രീയ പാർട്ടികളിലും വിവിധ സംഘടനകളിലും നുഴഞ്ഞുകയറിയിട്ടുള്ള ‘ദിമാഗി നക്സലുകളിൽ’ നിന്ന് (ഇന്റലക്ച്വൽ നക്സലുകൾ) രാജ്യത്തെ രക്ഷിക്കേണ്ടതുണ്ടെന്ന് അദ്ദേഹം പറഞ്ഞു. ഛത്തീസ്ഗഡിലെ ബസ്തർ ജില്ലയിലുള്ള കരൺപൂർ സി.ആർ.പി.എഫ് (CRPF) ക്യാമ്പിൽ ജവാന്മാർക്കൊപ്പം ദീപാവലി ആഘോഷിക്കവെ സുരക്ഷാ ഉദ്യോഗസ്ഥരെ അഭിസംബോധന ചെയ്ത് സംസാരിക്കുകയായിരുന്നു പ്രധാനമന്ത്രി.
സുരക്ഷാ സേനയുടെ ശക്തമായ ഇടപെടലുകളിലൂടെ കാടുകളിലെ മാവോയിസ്റ്റ് ഭീകരതയെ ഉന്മൂലനം ചെയ്യാൻ സാധിച്ചെങ്കിലും, നഗര കേന്ദ്രങ്ങളിലേക്കും രാഷ്ട്രീയ പാർട്ടികളിലേക്കും വ്യാപിച്ച നക്സൽ ചിന്താഗതികൾ രാജ്യത്തിന് ഭീഷണിയാണെന്ന് മോദി ചൂണ്ടിക്കാട്ടി. ‘ദിമാഗി നക്സലുകൾ’ നിലവിൽ പല പ്രമുഖ സംഘടനകളുടെയും ഭരണസമിതികളുടെയും നിയന്ത്രണം ഏറ്റെടുത്തിരിക്കുകയാണ്. ഇവർ ഭരണഘടനയ്ക്കും ജനാധിപത്യത്തിനും എതിരായി ജനങ്ങളെ നിരന്തരം തെറ്റിദ്ധരിപ്പിക്കുകയും പ്രകോപിപ്പിക്കുകയും ചെയ്യുകയാണെന്നും ഇത്തരം വിരുദ്ധ ശക്തികളെ തിരിച്ചറിഞ്ഞു പരാജയപ്പെടുത്തേണ്ടത് രാജ്യസുരക്ഷയ്ക്ക് അത്യന്താപേക്ഷിതമാണെന്നും അദ്ദേഹം വ്യക്തമാക്കി.
മുൻപ് രാജ്യം ഭരിച്ച സർക്കാരുകൾ മാവോയിസ്റ്റ് ആക്രമണങ്ങൾക്ക് മുൻപിൽ സുരക്ഷാസേനയുടെ കൈകൾ കെട്ടിയിടുകയാണ് ചെയ്തതെന്ന് പ്രധാനമന്ത്രി കുറ്റപ്പെടുത്തി. എന്നാൽ തങ്ങളുടെ സർക്കാർ അധികാരത്തിൽ വന്നതോടെ സുരക്ഷാ സേനയ്ക്ക് ഫലപ്രദമായി തിരിച്ചടിക്കാനുള്ള പൂർണ്ണ സ്വാതന്ത്ര്യം നൽകി. കൃത്യമായ നയങ്ങളുടെയും ശക്തമായ രാഷ്ട്രീയ ഇച്ഛാശക്തിയുടെയും ഫലമായാണ് മാവോയിസ്റ്റ് ഭീകരതയുടെ നട്ടെല്ലൊടിക്കാൻ സാധിച്ചതെന്നും, സർക്കാർ സംവിധാനങ്ങളിൽ നിന്ന് ഇടതുതീവ്രവാദത്തിന് ലഭിച്ചിരുന്ന പിന്തുണ പൂർണ്ണമായി അവസാനിപ്പിക്കാൻ കഴിഞ്ഞെന്നും അദ്ദേഹം കൂട്ടിച്ചേർത്തു.
മൃദു സമീപനങ്ങൾക്ക് പകരം വിവേചനരഹിതമായ വികസനവും കർശനമായ സുരക്ഷാ നടപടികളും ഏകോപിപ്പിച്ചാണ് നക്സൽ ബാധിത മേഖലകളെ തിരികെ കൊണ്ടുവന്നതെന്ന് മോദി വ്യക്തമാക്കി. മാവോയിസ്റ്റുകളുടെ വിതരണ ശൃംഖല തകർക്കാനും കള്ളനോട്ട് ഇടപാടുകൾ ഇല്ലാതാക്കാനും സാധിച്ചതോടെ ആക്രമണങ്ങളുടെ തോത് ഗണ്യമായി കുറഞ്ഞു. കഴിഞ്ഞ 47 വർഷത്തിനിടയിൽ ആദ്യമായി, കഴിഞ്ഞ ഒരു വർഷത്തിനിടെ ഡ്യൂട്ടിക്കിടെ സി.ആർ.പി.എഫ് ഉദ്യോഗസ്ഥരാരും കൊല്ലപ്പെട്ടിട്ടില്ലെന്ന ചരിത്രപരമായ നേട്ടവും പ്രധാനമന്ത്രി യോഗത്തിൽ ചൂണ്ടിക്കാട്ടി.
