മുൻ രാഷ്ട്രപതി പ്രണബ് മുഖർജിക്ക് പ്രധാനമന്ത്രിയാകാൻ ആഗ്രഹമുണ്ടായിരുന്നെന്നും അത് തന്നോട് സൂചിപ്പിച്ചത് ഞെട്ടിച്ചെന്നും കോൺഗ്രസ് നേതാവ് സോണിയ ഗാന്ധി. അവരുടെ ‘ബിലോങ്ങിങ്: എ ജേണി ഓഫ് ലവ്’ എന്ന പുസ്തകത്തിലാണ് ഈ വെളിപ്പെടുത്തൽ. സർക്കാരുമായി ഏകോപനം ഉറപ്പാക്കാൻ ആഴ്ചതോറും യോഗം ചേർന്നിരുന്ന കോർ ഗ്രൂപ്പിൽ പ്രണബ് മുഖർജി, അർജുൻ സിങ്, എ.കെ.ആന്റണി, അഹമ്മദ് പട്ടേൽ എന്നിവരുണ്ടായിരുന്നു.
2010-ൽ ധനമന്ത്രി പി. ചിദംബരവുമായുള്ള അഭിപ്രായവ്യത്യാസങ്ങൾക്ക് ശേഷം, ഏറ്റവും ഉയർന്ന പദവിയിൽ മാറ്റത്തിന് സമയമായി എന്ന് പ്രണബ് നിർദേശിച്ചതാണ് സോണിയയെ ഞെട്ടിച്ചത്. പ്രധാനമന്ത്രിയാകാനുള്ള ആഗ്രഹമായാണ് സോണിയ ഇതിനെ കണ്ടത്. താൻ തന്ത്രപരമായി വിഷയം മാറ്റിയെന്നും പിന്നീട് 2012-ൽ അദ്ദേഹം രാഷ്ട്രപതിയായി തിരഞ്ഞെടുക്കപ്പെട്ടെന്നും സോണിയ പുസ്തകത്തിൽ വ്യക്തമാക്കുന്നു.
സോണിയയുടെ വെളിപ്പെടുത്തലിന് മറുപടിയുമായി പ്രണബ് മുഖർജിയുടെ മകൾ ശർമ്മിഷ്ഠ മുഖർജി രംഗത്തെത്തി. പതിറ്റാണ്ടുകളുടെ ഭരണപരിചയവും അധ്വാനവുമുള്ള ഒരാൾക്ക് പ്രധാനമന്ത്രിയാകാൻ ആഗ്രഹമുണ്ടാകുന്നതിൽ ഞെട്ടേണ്ട കാര്യം എന്താണെന്നും അത് കുറ്റമാണോ എന്നും അവർ ചോദിച്ചു. ഗാന്ധി-നെഹ്‌റു കുടുംബത്തിന് പുറത്തുള്ള ഒരാൾ ഇത്തരം ആഗ്രഹം തുറന്നുപറഞ്ഞതുകൊണ്ടാണോ ഈ ഞെട്ടലെന്നും അവർ ചോദ്യമുയർത്തി.
കുടുംബപരമായ അവകാശങ്ങളിലൂടെ താലത്തിൽ വെച്ചുനീട്ടിയ പദവികളല്ല, മറിച്ച് സ്വന്തം കഴിവിലൂടെയും അധ്വാനത്തിലൂടെയുമാണ് തന്റെ പിതാവ് ഉയർന്നുവന്നതെന്ന് ശർമ്മിഷ്ഠ കൂട്ടിച്ചേർത്തു. സോണിയയോടോ മറ്റാരോടെങ്കിലുമോ പിതാവിന് വിരോധമുണ്ടായിരുന്നില്ലെന്നും രാഷ്ട്രീയത്തിലെ അരക്ഷിതാവസ്ഥ മനസ്സിലാക്കാൻ ശേഷിയുള്ള പ്രായോഗിക നേതാവായിരുന്നു അദ്ദേഹമെന്നും അവർ വ്യക്തമാക്കി.
