തെന്നിന്ത്യൻ നടൻ പ്രകാശ് രാജിന്റെ ട്വീറ്റ് വിവാദത്തില്‍. ഇന്ത്യയുടെ ചാന്ദ്രദൗത്യമായ ചന്ദ്രയാൻ 3നെ കുറിച്ച്‌ പരിഹാസരൂപേണയുള്ള പ്രകാശ് രാജിന്റെ ട്വീറ്റാണ് സോഷ്യല്‍ മീഡിയയില്‍ വിമര്‍ശനങ്ങള്‍ ഏറ്റുവാങ്ങുന്നത്.
ഒരു ദേശീയ വിഷയത്തെ രാഷ്ട്രീയവത്കരിച്ചു എന്ന ആരോപണവുമായി താരത്തിനെതിരെ ഒട്ടേറെ ആളുകള്‍ രംഗത്തെത്തുന്നുണ്ട്.
ചന്ദ്രയാൻ 3 ദൌത്യത്തിലെ വിക്രം ലാൻഡറിനെ പരിഹസിച്ചുക്കൊണ്ടായിരുന്നു പ്രകാശ് രാജിന്റെ ട്വീറ്റ്. ‘ബ്രേക്കിങ് ന്യൂസ്: ചന്ദ്രനില്‍നിന്ന് വിക്രം ലാൻഡര്‍ അയയ്ക്കുന്ന ആദ്യ ചിത്രം’ എന്ന കുറിപ്പോടെ, മുണ്ട് മടക്കിക്കുത്തി ഷര്‍ട്ട് ഇട്ടൊരാള്‍ ചായ അടിക്കുന്ന ചിത്രമാണു പ്രകാശ് രാജ് എക്സില്‍ (ട്വിറ്റര്‍) പങ്കുവച്ചത്.
ഐഎസ്‍ആര്‍ഒയെയും ശാസ്ത്രജ്ഞരെയും പരിഹസിക്കുന്ന ട്വീറ്റിനെതിരെ പലരും രംഗത്തെത്തി. തൊട്ടുപിന്നാലെ ഐ എസ് ആര്‍ ഒ ശാസ്ത്രജ്ഞരും ജീവനക്കാരും മറുപടിയുമായി എത്തിയിട്ടുണ്ട്. ഒരു വ്യക്തിയോട് വിയോജിപ്പ് കാണിക്കുന്നതും സ്വന്തം രാജ്യത്തോട് നിഷേധാത്മക പുലര്‍ത്തുന്നതും തമ്മില്‍ വ്യത്യാസമുണ്ടെന്നാണ് ഒരു ഐ എസ് ആര്‍ ഒ ജീവനക്കാരൻ കുറിക്കുന്നത്.
