തിരുവനന്തപുരം: അന്തരിച്ച മുതിര്ന്ന സിപിഎം നേതാവ് ആനത്തലവട്ടം ആനന്ദന്റ സംസ്കാരം ഇന്ന് വൈകീട്ട് അഞ്ച് മണിക്കു ശാന്തി കവാടത്തില്.
ഉച്ചയ്ക്ക് രണ്ട് മണിക്കു ശേഷം സിഐടിയു ഓഫീസില് പൊതു ദര്ശനം.
സിപിഎം മുതിര്ന്ന നേതാവും സിഐടിയു സംസ്ഥാന പ്രസിഡന്റുമായ ആനത്തലവട്ടം ആനന്ദന്റെ മരണം തിരുവനന്തപുരം മെഡിക്കല് കോളജില് വച്ചായിരുന്നു. രോഗബാധയെ തുടര്ന്ന് ചികിത്സയിലായിരുന്നു 86 കാരനായ അദ്ദേഹം.
1937 ഏപ്രില് 22 ന് തിരുവനന്തപുരം ജില്ലയിലെ വര്ക്കല ചിലക്കൂരില് കേടുവിളാകത്ത് വിളയില് നാരായണിയുടെയും വി.കൃഷ്ണന്റെയും മകനായി ജനിച്ചു. 1954ല് ഒരണ കൂടുതല് കൂലിക്കു വേണ്ടി നടന്ന കയര് തൊഴിലാളി പണിമുടക്ക് ആനന്ദന് രാഷ്ട്രീയത്തിലേക്കും സാമൂഹിക പ്രവര്ത്തനത്തിലേക്കുമുള്ള ആദ്യ പടിയായി.
1956ല് കമ്മ്യൂണിസ്റ്റ് പാര്ട്ടിയില് അംഗം ആയി. പാര്ട്ടി പിളര്ന്നപ്പോള് സിപിഎമ്മിനൊപ്പം ചേര്ന്നു.1971ല് സിപിഎം ജില്ലാ കമ്മിറ്റി അംഗം, ട്രാവന്കൂര് കയര് തൊഴിലാളി യൂണിയന് ജനറല് സെക്രട്ടറി, കേരള കയര് വര്ക്കേഴ്സ് സെന്റര് ജോയിന്റ് സെക്രട്ടറി എന്നീ പദവികള് വഹിച്ചു. 1972ല് കേരള കയര് വര്ക്കേഴ്സ് സെന്റര് സെക്രട്ടറി ആയി. സിഐടിയു ദേശീയ വൈസ് പ്രസിഡന്റും അപ്പക്സ് ബോഡി ഫോര് കയര് വൈസ് ചെയര്മാനുമാണ്. ഭാര്യ ലൈല. മക്കള്: ജീവ ആനന്ദൻ, മഹേഷ് ആനന്ദൻ.
1987 ല് ആറ്റിങ്ങലില്നിന്നാണ് ആദ്യതവണ നിയമസഭയിലെത്തിയത്. 91ല് വീണ്ടും മല്സരിച്ചെങ്കിലും 316 വോട്ടിന് കോണ്ഗ്രസ് സ്ഥാനാര്ഥി ടി. ശരത്ചന്ദ്രപ്രസാദിനോട് പരാജയപ്പെട്ടു. 96 ല് ആറ്റിങ്ങലില്ത്തന്നെ വക്കം പുരുഷോത്തമനെ പരാജയപ്പെടുത്തിയായിരുന്നു രണ്ടാം ജയം. 2006 ല് സി. മോഹനചന്ദ്രനെതിരെ 11208 വോട്ടിന്റെ ഭൂരിപക്ഷത്തിലാണ് ജയിച്ചു കയറിയത്. 2006 മുതല് 2011 വരെ ചീഫ് വിപ്പായിരുന്നു.
തൊഴിലാളികള്ക്ക് വേണ്ടി പോരാടിയ ആനത്തലവട്ടം ആനന്ദൻ തൊഴിലാളി വര്ഗത്തിന്റെ പ്രശ്നങ്ങള് പഠിച്ച് അത് കൃത്യമായി പരിഹരിക്കാനും വേണ്ട രീതിയില് ഇടപെടല് നടത്താനും മുന്നിലായിരുന്നു.
പിണറായി വിജയൻ സര്ക്കാര് കാലത്തും കെഎസ്ആര്ടിസി തൊഴിലാളികള്ക്ക്ക്ക് വേണ്ടി പോരാടി അവര്ക്കൊപ്പമായിരുന്നു ആനത്തലവട്ടം ആനന്ദൻ. കയര്, കൈത്തറി പരമ്ബരാഗത മേഖലയിലെ തൊഴിലാളികളുടെ ആവശ്യങ്ങള്ക്ക് വേണ്ടി പോരാടിയ നേതാവായിരുന്നു അദ്ദേഹം.