അനിൽ ആറന്മുള
ഹ്യൂസ്റ്റൺ: ഹ്യൂസ്റ്റണിൽ കഴിഞ്ഞ ആറ് വർഷമായി നൂറിലധികം ആളുകൾക്ക് കളരി പരിശീലനം നൽകിവരുന്ന ദിവാൻ കളരി ആൻഡ് മാർഷൽ ആർട്സ് അക്കാദമി അവരുടെ പ്രഥമ കളരിപ്പയറ്റ് ഷോയായ ‘ഓതിരം 2025’ സ്റ്റാഫോർഡ് സിവിക് സെന്ററിൽ 2025 ഒക്ടോബർ 5-ന് അരങ്ങേറും. പരിപാടിയുടെ കിക്കോഫ് മിസോറി സിറ്റിയിലെ അപ്നാ ബസാർ ഓഡിറ്റോറിയത്തിൽ വൻ ജനപങ്കാളിത്തത്തോടെ നടന്നു. മിസോറി സിറ്റി മേയർ റോബിൻ ഇലക്കാട്ട്, സ്റ്റാഫോർഡ് സിറ്റി മേയർ കെൻ മാത്യു, ഫോർട്ട് ബെൻഡ് കൗണ്ടി ജഡ്ജ് ജൂലി മാത്യു, ക്യാപ്റ്റൻ മനോജ്‌കുമാർ പൂപ്പാറയിൽ എന്നിവർ ചേർന്ന് പരിപാടിയുടെ മുഖ്യ സ്പോൺസർ ഷിജിമോൻ ജേക്കബിന് ആദ്യ ടിക്കറ്റ് നൽകി കിക്കോഫ് നിർവഹിച്ചു.
പരിപാടിയുടെ തുടക്കത്തിൽ മേയർ കെൻ മാത്യു, ഫോർട്ട് ബെൻഡ് കൗണ്ടി ജഡ്ജ് ജൂലി മാത്യു, ക്യാപ്റ്റൻ മനോജ്‌കുമാർ പൂപ്പാറയിൽ, സ്പോൺസർ ഷിജിമോൻ ജേക്കബ്, ജഗന്നാഥൻ ചിറയിൽ, ഇന്ദിര ജഗന്നാഥൻ, ദിവാൻ കളരി ഗുരുക്കൾ രാജുമോൻ നാരായണൻ, റെജി രാജുമോൻ എന്നിവർ ചേർന്ന് ഭദ്രദീപം കൊളുത്തി. തുടർന്ന് കളരി വിദ്യാർഥിയും സ്പോൺസറുമായ ഷിജോ ചാണ്ടപ്പിള്ള സ്വാഗതം ആശംസിച്ചു. ദിവാൻ കളരിയുടെ സ്ഥാപകനും ഗുരുക്കളുമായ രാജുമോൻ നാരായണൻ കളരിയുടെ സ്ഥാപനത്തെക്കുറിച്ചും ലക്ഷ്യങ്ങളെക്കുറിച്ചും സംസാരിച്ചു.
രാജുമോൻ നാരായണൻ നാല്പത്തിയൊന്ന് വർഷം മുൻപ് കുട്ടനാട്ടിലെ രാമങ്കരിയിൽ നിന്ന് അമേരിക്കയിലേക്ക് കുടിയേറിയ വ്യക്തിയാണ്. ചെറുപ്പത്തിൽ തന്നെ കളരി പരിശീലനം പൂർത്തിയാക്കിയ അദ്ദേഹം കരാട്ടെയിലും പ്രാവീണ്യം നേടി ബ്ലാക്ക് ബെൽറ്റ് കരസ്ഥമാക്കിയിട്ടുണ്ട്. നല്ലൊരു ഗായകനും അഭിനേതാവുമായ രാജുമോൻ 1982-ലെ കേരള യൂണിവേഴ്സിറ്റി കലോത്സവത്തിൽ മിമിക്രിക്ക് ഒന്നാം സ്ഥാനം നേടിയിട്ടുണ്ട്. ആറ് വർഷം മുൻപാണ് രാജുമോൻ മിസോറി സിറ്റിയിൽ ദിവാൻ കളരി സ്ഥാപിച്ചത്. കേരളത്തിന്റെ തനത് ആയോധനകലയായ കളരി ഒരു യുദ്ധമുറയായി പുരാതന കേരളത്തിൽ ഉപയോഗിച്ചിരുന്നെങ്കിലും, അതൊരു മികച്ച വ്യായാമമുറ കൂടിയാണെന്ന് രാജുമോൻ ഓർമ്മിപ്പിച്ചു. ഒരു വ്യക്തിയുടെ ശാരീരികവും മാനസികവും ആധ്യാത്മികവുമായ വികാസമാണ് കളരി പരിശീലനത്തിലൂടെ സാധ്യമാകുന്നതെന്ന് അദ്ദേഹം വിശദീകരിച്ചു. കളരി പരിശീലിക്കുന്ന ഒരാൾക്ക് മനഃശക്തി വികാസം, ഉറച്ച ആത്മവിശ്വാസം, ലക്ഷ്യത്തിൽ ശ്രദ്ധ കേന്ദ്രീകരിക്കാനുള്ള കഴിവ്, എല്ലാറ്റിലുമുപരി ധാർമ്മികതയിൽ ഉറച്ച അച്ചടക്കം എന്നിവ സ്വായത്തമാകുമെന്നും രാജുമോൻ പറഞ്ഞു. ദിവാൻ കളരിയിൽ അഞ്ച് വയസ്സ് മുതൽ അറുപത് വയസ്സ് വരെ പ്രായമുള്ളവർക്ക് പരിശീലനം നൽകുന്നുണ്ട്.
കളരിപ്പയറ്റ്, കളരി നൃത്തം, പരിശീലനം എന്നിവ കോർത്തിണക്കിയ ഒരു ഷോയാണ് ‘ഓതിരം 2025’. അമേരിക്കയിൽ ആദ്യത്തെതെന്ന് വിശേഷിപ്പിക്കാവുന്നതും കേരളത്തിന്റെ സാംസ്കാരികത്തനിമ വിളിച്ചോതുന്നതുമായ ഈ മെഗാ ഷോയ്ക്ക് എല്ലാവരുടെയും സഹകരണം അദ്ദേഹം അഭ്യർത്ഥിച്ചു.
മേയർ റോബിൻ ഇലക്കാട്ട്, മേയർ കെൻ മാത്യു, കൗണ്ടി കോർട്ട് ജഡ്ജ് ജൂലി മാത്യു, ക്യാപ്റ്റൻ മനോജ്‌കുമാർ പൂപ്പാറയിൽ, ഇൻഡ്യാ പ്രസ്ക്ലബ് നാഷണൽ വൈസ് പ്രസിഡന്റ് അനിൽ ആറന്മുള, ഹ്യൂസ്റ്റൺ ചാപ്റ്റർ പ്രസിഡന്റും ‘നേർകാഴ്ച’ ന്യൂസ് ചീഫ് എഡിറ്ററുമായ സൈമൺ വാളാച്ചേരിൽ, ജീമോൻ റാന്നി, മാഗ് പ്രസിഡന്റ് ജോസ് കെ ജോൺ, അനിൽ പ്ലാവോട്, എബ്രഹാം ഈപ്പൻ തുടങ്ങിയ സാമൂഹ്യ സാംസ്കാരിക പ്രവർത്തകർ ആശംസകൾ അർപ്പിച്ചു. അനില സന്ദീപ് നന്ദി പ്രകടനം നടത്തി. അനിൽ ജനാർദ്ദനൻ ആയിരുന്നു എം.സി.
Diwan Kalari group with mega show ‘Othiram 2025’: Kickoff a huge success
