ഗാസയിലെ ഏക കത്തോലിക്ക പള്ളി ആയ ഹോളി ഫാമിലി ചർച്ചിനു നേരെ ഇസ്രയേല്‍ സൈന്യം നടത്തിയ ആക്രമണത്തില്‍ രണ്ട് പേര്‍ കൊല്ലപ്പെടുകയും, പള്ളിയിലെ പുരോഹിതനായ ഫാ. ഗബ്രിയേല്‍ റൊമാനെല്ലിക്ക് ഗുരുതരമായി പരിക്കേല്‍ക്കുകയും ചെയ്തു.
ഈ ആക്രമണത്തെ കുറിച്ച് ജറുസലേമിലെ ലാറ്റിന്‍ പാത്രിയാര്‍ക്കേറ്റ് പ്രസ്താവനം ചെയ്തു. “ഇന്ന് രാവിലെ നടന്ന ആക്രമണത്തില്‍ രണ്ട് പേരാണ് മരണപ്പെട്ടത്. അവരുടെ ആത്മാക്കള്‍ക്ക് നിത്യശാന്തി നേര്‍ന്നും, ഈ ക്രൂര യുദ്ധം അവസാനിക്കണമെന്നും ഞങ്ങൾ പ്രാര്‍ഥിക്കുന്നു. നിരപരാധികളായ സാധാരണക്കാരെ ലക്ഷ്യമിടുന്നതിനെ ന്യായീകരിക്കാനാവില്ല,” പാത്രിയാര്‍ക്കേറ്റ് എഎഫ്പിക്ക് നല്‍കിയ പ്രസ്താവനയില്‍ പറഞ്ഞു.
വത്തിക്കാന്റെയും പ്രതികരണം പുറത്തുവന്നു. ഗാസയിലെ ക്രിസ്ത്യന്‍ പള്ളിയില്‍ നടന്ന ആക്രമണത്തില്‍ പാപ്പാ ഫ്രാന്‍സിസ് അതീവ ദുഃഖം രേഖപ്പെടുത്തി. താന്‍ നേരത്തെ നടത്തിയ വെടിനിര്‍ത്തലിനുള്ള ആഹ്വാനം അദ്ദേഹം ആവര്‍ത്തിച്ചു.
ഇതാദ്യമായല്ല ഗാസയിലെ ക്രിസ്ത്യന്‍ പള്ളികള്‍ക്കുനേരെ ഇസ്രയേല്‍ ആക്രമണം നടക്കുന്നത്. നാലാം നൂറ്റാണ്ടില്‍ സ്ഥാപിതമായ സെന്റ് പോര്‍ഫിറിയസ് പള്ളിക്കുമേല്‍ നേരത്തെ ഉണ്ടായ ആക്രമണത്തില്‍ 18 പലസ്തീനികള്‍ കൊല്ലപ്പെട്ടിരുന്നു.
ഹോളി ഫാമിലി പള്ളിയുടെ സമുച്ചയത്തില്‍ വലിയ നാശമാണ് സംഭവിച്ചത്. പള്ളിയിലായിരുന്നു കുട്ടികളെയും 54 ഭിന്നശേഷിക്കാരെയും ഉള്‍പ്പെടെ 600 പേര്‍ അഭയം തേടിയിരുന്നത്.
ഇറ്റാലിയന്‍ പ്രധാനമന്ത്രി ജോര്‍ജിയ മെലോനിയും ആക്രമണത്തില്‍ പ്രതിഷേധം രേഖപ്പെടുത്തി. സാധാരണക്കാര്‍ക്കുനേരെയുള്ള ഇസ്രയേല്‍ ആക്രമണങ്ങള്‍ അംഗീകരിക്കാനാവില്ലെന്നും അവര്‍ പറഞ്ഞു.
Gaza’s Only Catholic Church Damaged in Israeli Attack; Priest Injured, Two Killed
