കൊച്ചി: പ്രമുഖ റാപ്പ് ഗായകനായ ഹിരൺദാസ് മുരളി (വേടൻ) എന്നയാൾക്കെതിരെ ലൈംഗികാരോപണവുമായി യുവ വനിതാ ഡോക്ടർ. വിവാഹ വാഗ്ദാനം നൽകി പീഡിപ്പിച്ചെന്ന് കാണിച്ച് യുവതി തൃക്കാക്കര പോലീസിൽ പരാതി നൽകി. യുവതിയുടെ മൊഴി രേഖപ്പെടുത്തിയ പോലീസ്, ഇന്ത്യൻ ശിക്ഷാനിയമം സെക്ഷൻ 69 പ്രകാരം കേസെടുത്തു.
2021 മുതൽ 2023 വരെയുള്ള കാലയളവിൽ പല സ്ഥലങ്ങളിൽ വെച്ച് പലതവണ പീഡിപ്പിച്ചെന്നാണ് പരാതിയിൽ പറയുന്നത്. കോഴിക്കോട്, കൊച്ചി, ഏലൂർ എന്നിവിടങ്ങളിൽ വെച്ച് അഞ്ച് തവണയോളം പീഡനം നടന്നതായും യുവതി പോലീസിനോട് വെളിപ്പെടുത്തി.
സാമ്പത്തിക ഇടപാടുകളും പരാതിയിൽ
വേടനമായി സാമ്പത്തിക ഇടപാടുകളുണ്ടായിരുന്നതായും യുവതി പരാതിയിൽ പറയുന്നു. വർഷങ്ങളായി താൻ വേടന് പണം നൽകിയിരുന്നെന്നും, ഇതിന്റെ അക്കൗണ്ട്, യുപിഐ വിവരങ്ങൾ പോലീസിന് കൈമാറിയതായും യുവതി മൊഴി നൽകി. വിവാഹ വാഗ്ദാനത്തിൽ നിന്ന് വേടൻ പിന്മാറിയത് തന്നെ വൈകാരികമായി തളർത്തിയെന്നും യുവതി മൊഴിയിൽ പറയുന്നു.
നേരത്തെയുള്ള കേസുകളും വിവാദങ്ങളും
ഈ വർഷം ഏപ്രിലിൽ, കൊച്ചിയിലെ ഒരു അപ്പാർട്ട്‌മെന്റിൽ നിന്ന് 6 ഗ്രാം കഞ്ചാവ് പിടിച്ചെടുത്തതിന് പിന്നാലെ വേടനെയുൾപ്പെടെ എട്ടുപേരെ പോലീസ് അറസ്റ്റ് ചെയ്തിരുന്നു. ഈ കേസിൽ വേടനെ പിന്നീട് കുറ്റവിമുക്തനാക്കിയിരുന്നു. ഇതിനുശേഷം സർക്കാർ പരിപാടികളിൽ ഇയാളെ പങ്കെടുപ്പിച്ചതും സി.പി.എം. സംസ്ഥാന സെക്രട്ടറി എം.വി. ഗോവിന്ദൻ വേടനെ പിന്തുണച്ചതും വലിയ വിവാദങ്ങൾക്ക് കാരണമായിരുന്നു.
Sexual allegation against ‘Vedan’; Case registered on complaint of female doctor
