അമേരിക്കയുമായുള്ള സാമ്പത്തിക ബന്ധം വളരെ പ്രധാനപ്പെട്ടത്; ട്രംപിൻ്റെ ‘നിർജ്ജീവ സമ്പദ്‌വ്യവസ്ഥ’ പരാമർശത്തിൽ രാഹുലിന്റെ നിലപാടിനെ പിന്തുണയ്ക്കുന്നില്ലെന്ന് തരൂർ

തിരുവനന്തപുരം: അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ‘നിർജീവ സമ്പദ്‌വ്യവസ്ഥ’ എന്ന പരാമർശത്തെക്കുറിച്ചുള്ള കോൺഗ്രസ് നേതാവ് രാഹുൽ ഗാന്ധിയുടെ നിലപാടിനോട് പ്രതികരിക്കാൻ താനില്ലെന്ന് ശശി തരൂർ എംപി. എന്നാൽ ഇന്ത്യ-അമേരിക്കൻ വ്യാപാരബന്ധം തകരാൻ സാധ്യതയുണ്ടെന്ന ആശങ്ക അദ്ദേഹം പങ്കുവെച്ചു. “എന്റെ പാർട്ടി നേതാവിന്റെ പ്രസ്താവനയെക്കുറിച്ച് ഞാൻ അഭിപ്രായം പറയാൻ ആഗ്രഹിക്കുന്നില്ല,” എന്ന മുഖവുരയോടെയാണ് തരൂർ സംസാരിച്ചു തുടങ്ങിയത്.

“അമേരിക്കയുമായുള്ള നമ്മുടെ തന്ത്രപരവും സാമ്പത്തികവുമായ ബന്ധം വളരെ പ്രധാനപ്പെട്ടതാണ് എന്നതാണ് എന്റെ ആശങ്ക. ഏകദേശം 90 ബില്യൺ ഡോളറിന്റെ കയറ്റുമതിയാണ് നമ്മൾ അമേരിക്കയിലേക്ക് നടത്തുന്നത്. ഈ വ്യാപാരബന്ധം ദുർബലമാവുകയോ അവസാനിക്കുകയോ ചെയ്താൽ അത് വലിയ നഷ്ടമാകും. ഇത് താങ്ങാൻ നമുക്ക് കഴിയില്ല,” തരൂർ പറഞ്ഞു.

ഇന്ത്യക്ക് അനുകൂലമായ ഒരു കരാറിലെത്താൻ ചർച്ചക്കാർക്ക് കൂടുതൽ പിന്തുണ നൽകണമെന്നും അദ്ദേഹം ആവശ്യപ്പെട്ടു. കൂടാതെ, അമേരിക്കയിൽനിന്ന് എന്തെങ്കിലും നഷ്ടമുണ്ടായാൽ അത് നികത്താനായി മറ്റ് രാജ്യങ്ങളിലേക്കുള്ള കയറ്റുമതി സാധ്യതകളും പരിശോധിക്കണമെന്നും തരൂർ നിർദേശിച്ചു.

ഉപരാഷ്ട്രപതി തിരഞ്ഞെടുപ്പ്

അടുത്ത ഉപരാഷ്ട്രപതി സ്ഥാനാർത്ഥിയെ ഭരണകക്ഷി നാമനിർദ്ദേശം ചെയ്യുമെന്നും, കൂടിയാലോചനകൾ നടക്കുമെന്ന് പ്രതീക്ഷിക്കുന്നതായും തരൂർ പറഞ്ഞു. “ഇലക്ടറൽ കോളേജിന്റെ ഘടന ഇതിനകം തീരുമാനിക്കപ്പെട്ടിട്ടുള്ളതിനാൽ അടുത്ത ഉപരാഷ്ട്രപതി ഭരണകക്ഷി നോമിനിയായിരിക്കുമെന്ന് നമുക്കറിയാം,” അദ്ദേഹം കൂട്ടിച്ചേർത്തു.

മാനനഷ്ടക്കേസ്

ഒരു ബിജെപി നേതാവിനെതിരെ താൻ ഫയൽ ചെയ്ത മാനനഷ്ടക്കേസ് അവസാനിപ്പിക്കാൻ സുപ്രീം കോടതി നിർദ്ദേശിച്ചതിനെക്കുറിച്ചും തരൂർ പ്രതികരിച്ചു. “നമ്മുടെ നീതിന്യായ വ്യവസ്ഥയിലെ വലിയൊരു പ്രശ്നമാണിത്. ചിലപ്പോൾ നിസ്സാര കേസുകൾ പോലും അനുവദിക്കുകയും പിന്നീട് ആ പ്രക്രിയ തന്നെ ശിക്ഷയായി മാറുകയും ചെയ്യുന്നു. അർത്ഥവത്തായ കേസുകളിൽ സമയം ചെലവഴിക്കുന്നതിന് പകരം, രാഷ്ട്രീയ ലക്ഷ്യങ്ങളോടെ ഫയൽ ചെയ്യുന്ന കേസുകളിൽ കോടതി സമയം പാഴാകുകയാണോ?” അദ്ദേഹം ചോദിച്ചു.

2011-ൽ ഒരു പുസ്തകത്തിൽ പ്രസിദ്ധീകരിച്ച ഒരു ലേഖനത്തിലെ ഒരു ഉദ്ധരണി മാത്രമാണ് താൻ ഉപയോഗിച്ചതെന്നും, ആറ് വർഷത്തിന് ശേഷമാണ് തനിക്കെതിരെ കേസ് ഫയൽ ചെയ്തതെന്നും തരൂർ വ്യക്തമാക്കി. കേസ് അവസാനിപ്പിക്കാനുള്ള കോടതിയുടെ ഉപദേശം അതുകൊണ്ട് തന്നെ അത്ഭുതകരമല്ലെന്നും അദ്ദേഹം കൂട്ടിച്ചേർത്തു.

Economic ties with US are very important; Tharoor says he doesn’t support Rahul’s stance on Trump’s ‘dead economy’ remark