ലണ്ടൻ :വിയറ്റ്നാമിലെ തുങ് ബിൻ 1 ഗുഹയിൽ നിന്നു കണ്ടെത്തിയ ഏകദേശം 12,000–12,500 വർഷം പഴക്കമുള്ള ഒരു യുവാവിന്റെ അസ്ഥികൂടം ശാസ്ത്രലോകത്തെ അതിശയിപ്പിക്കുന്നു. ശാസ്ത്രജ്ഞരുടെ വിലയിരുത്തലിൽ, ഈ യുവാവിന്റെ മരണകാരണം ക്വാർട്‌സ് പോലെയുള്ള കൂർത്ത കല്ലായുധം കഴുത്തിൽ തുളച്ചുകയറിയതാണ്.
കഴുത്തിലെ അപൂർവ്വ എല്ലിന് പരിക്ക്
പ്ലീസ്റ്റോസീൻ യുഗത്തിൽ (26 ലക്ഷം മുതൽ 11,700 വർഷം മുൻപ്) ജീവിച്ചിരുന്നുവെന്ന് കരുതുന്ന 35 കാരന്റെ കഴുത്തിലെ സെർവിക്കൽ റിബ്ബിലാണ് (മനുഷ്യരിൽ അപൂർവ്വമായി മാത്രം കാണുന്ന അധിക എല്ല്) ആയുധം തുളച്ചുകയറിയത്.
പരിക്കേറ്റ ശേഷവും ഇയാൾ മാസങ്ങളോളം ജീവിച്ചു. കഴുത്തിലെ എല്ലിൽ അണുബാധയും കോശവളർച്ചയും കണ്ടതിൽ നിന്നാണ് ഇത് തെളിഞ്ഞത്.
ക്വാർട്‌സ് ആയുധത്തിന്റെ മുന
പരിക്കേറ്റ എല്ലിന് സമീപം 18.28 മില്ലിമീറ്റർ നീളവും 0.4 ഗ്രാം ഭാരവുമുള്ള ഒരു ക്വാർട്‌സ് കഷണം കണ്ടെത്തി. ശിലായുധങ്ങളുടെ സാധാരണ അടയാളങ്ങൾ അതിലുണ്ടായിരുന്നു. എന്നാൽ ഗുഹയിൽ മറ്റ് ആയുധങ്ങൾ ഒന്നും കണ്ടെത്താനായില്ല.
ഇതുകൊണ്ട്, ഇത് പുറത്തുനിന്ന് കൊണ്ടുവന്ന സാങ്കേതിക വിദ്യ ആയിരിക്കാമെന്ന് ഗവേഷകർ കരുതുന്നു.
കണ്ടെത്തലും പുനർനിർമ്മാണവും
2017 ഡിസംബറിലാണ് അസ്ഥികൂടം കണ്ടെത്തിയത്. തലയോട്ടി പൊട്ടിപ്പോയിരുന്നെങ്കിലും പല്ലുകളും പ്രധാന ഭാഗങ്ങളും എല്ലാം ഉണ്ടായിരുന്നു.
ഗുഹയിലെ പ്രതികൂല സാഹചര്യങ്ങൾ കാരണം എല്ലുകൾ വലിയ മൺകട്ടകളായിട്ടാണ് നീക്കം ചെയ്തത്. പിന്നീട് മാസങ്ങളെടുത്ത് ലാബിൽ അവ പുനർനിർമ്മിച്ചു.
കരിയുടെ റേഡിയോ കാർബൺ ഡേറ്റിങ്ങിലൂടെ 12,000–12,500 വർഷം പഴക്കം ഉറപ്പിച്ചു.
ക്രിസ് സ്റ്റിംസൺ (ഓക്‌സ്‌ഫോർഡ് നാച്ചുറൽ ഹിസ്റ്ററി മ്യൂസിയം): “വലിയ കേടുപാടുകൾ കൂടാതെ ലഭിച്ച അപൂർവ്വ കണ്ടെത്തൽ. പഠനത്തിന് വലിയ വില.”
ഹ്യൂഗോ റെയ്സ് സെന്റീനോ (കെന്റക്കി സർവകലാശാല): “പ്ലീസ്റ്റോസീൻ യുഗത്തിലെ നായാടി–വിഭവശേഖരികൾ തമ്മിലുള്ള സംഘർഷത്തിന്റെ ഏറ്റവും പുരാതന തെളിവ് ഇതായിരിക്കാം.”
പരിക്കേറ്റിട്ടും ഇയാളെ സംരക്ഷിക്കുകയും പിന്നീട് ഗുഹയിൽ അടക്കം ചെയ്യുകയും ചെയ്തിരുന്നു.
ശാസ്ത്രജ്ഞർ പറയുന്നു: “അദ്ദേഹം മാസങ്ങളോളം ജീവിച്ചു. മരിക്കുമ്പോൾ ഒറ്റയ്ക്കല്ലായിരുന്നു. കൂട്ടുകാരും സമൂഹവും പരിപാലിച്ചു.”
പഠനം പ്രസിദ്ധീകരിച്ചത് “പ്രൊസീഡിംഗ്സ് ഓഫ് ദി റോയൽ സൊസൈറ്റി ബി: ബയോളജിക്കൽ സയൻസസ്” ജേർണലിലാണ്.
Evidence of Murder Found in 12,000-Year-Old Human Skeleton in Vietnam
