തൃശൂർ: തമിഴ്‌നാട്ടിലെ കരൂർ കറുപ്പസ്വാമി ക്ഷേത്രത്തിന് സമർപ്പിക്കാനായി തൃശൂരിൽ നിർമിച്ച 12 അടി ഉയരവും 1475 കിലോഗ്രാം ഭാരവുമുള്ള ഒരു ഭീമാകാരമായ വിളക്കാണ് ‘കൃഷ്ണകിരീടം’. 108 തട്ടുകളുള്ള (വിളക്കിന്റെ ഇതളുകൾ) ഈ വിളക്ക് 15 തൊഴിലാളികൾ 20 ദിവസം കൊണ്ടാണ് നിർമിച്ചത്. തൃശൂരിലെ നടവരമ്പ് കൃഷ്ണ മെറ്റൽ സ്റ്റോർ ആണ് ഇതിന്റെ നിർമ്മാതാക്കൾ.
ഇതേ മാതൃകയിൽ നടവരമ്പ് കൃഷ്ണ മെറ്റൽ സ്റ്റോർ നിർമിക്കുന്ന മൂന്നാമത്തെ വിളക്കാണിത്. ഇതുവരെ നിർമിച്ചതിൽ ഏറ്റവും വലുതും ഇതാണ്. നേരത്തെ നിർമിച്ച വിളക്കുകൾ കണ്ടതിനെത്തുടർന്നാണ്, അതേ മാതൃകയിൽ ഉയരവും ഭാരവും കൂട്ടി ഒരു വിളക്ക് നിർമിച്ചുനൽകണമെന്ന് കരൂരിലെ ക്ഷേത്രം ഭാരവാഹികൾ ആവശ്യപ്പെട്ടത്.
വിളക്കിന്റെ 108 തട്ടുകളും ആവശ്യമുള്ളപ്പോൾ അഴിച്ചുമാറ്റാൻ സാധിക്കുന്ന രീതിയിലാണ് നിർമിച്ചിട്ടുള്ളതെന്ന് നടവരമ്പ് ഉടമകളായ പി.എസ്. കൃഷ്ണൻ, പി.എസ്. വിജയ് എന്നിവർ പറഞ്ഞു. വിളക്ക് പൂർണമായി ഫിറ്റ് ചെയ്യാൻ രണ്ടര മുതൽ മൂന്ന് മണിക്കൂർ വരെ സമയമെടുക്കും. തൃശൂരിൽ നിന്ന് അഴിച്ചുമാറ്റിയ ശേഷം ഇത് കരൂരിലേക്ക് കൊണ്ടുപോകും.
Krishna Kiridam: The 1475 Kg Colossal Lamp Made in Thrissur to Light Up in Tamil Nadu
