ഓസ്റ്റിൻ: ടെക്സസിലെ അഞ്ച് യുഎസ് കോൺഗ്രസ് മണ്ഡലങ്ങൾ റിപ്പബ്ലിക്കൻ പാർട്ടിക്ക് അനുകൂലമാകുന്ന രീതിയിൽ പുനർനിർണയം ചെയ്യുന്നതിനുള്ള റീഡിസ്ട്രിക്ടിങ് ബിൽ ടെക്സസ് ജനപ്രതിനിധി സഭ പാസാക്കി. ഇനി ബില്ലിന് സെനറ്റിന്റെ അംഗീകാരം കൂടി ആവശ്യമാണ്. ഈ നടപടി 2026-ലെ തിരഞ്ഞെടുപ്പിൽ ഡെമോക്രാറ്റുകൾക്ക് വൻ തിരിച്ചടിയാകുമെന്നാണ് റിപ്പബ്ലിക്കൻ പാർട്ടിയുടെ കണക്കുകൂട്ടൽ. വർഷങ്ങളായി തുടർന്ന ചർച്ചകൾക്കും ലോബിയിങ്ങുകൾക്കും ശേഷമാണ് ബിൽ ജനപ്രതിനിധി സഭയിൽ പാസായത്. ഡെമോക്രാറ്റുകൾ ബില്ലിനെ തുടക്കം മുതൽക്കേ ശക്തമായി എതിർത്തിരുന്നു.
സാധാരണയായി, ഓരോ പത്ത് വർഷത്തിലും സെൻസസിന് ശേഷമാണ് മണ്ഡല പുനർനിർണയം നടത്താറുള്ളത്. കഴിഞ്ഞ പുനർനിർണയം 2021-ൽ നടന്നതിനാൽ, ഈ നീക്കം അസാധാരണമാംവിധം നേരത്തെയാണെന്ന് ഡെമോക്രാറ്റുകൾ ആരോപിക്കുന്നു. പ്രതിപക്ഷത്തിന്റെ കടുത്ത എതിർപ്പിനെ മറികടന്ന് 88-52 എന്ന ഭൂരിപക്ഷത്തിലാണ് ബിൽ പാസായത്. 2026-ൽ യുഎസ് കോൺഗ്രസിൽ ഭൂരിപക്ഷം നേടുക എന്ന ലക്ഷ്യത്തോടെയാണ് റിപ്പബ്ലിക്കൻ പാർട്ടി തിടുക്കത്തിൽ ഈ നീക്കം നടത്തിയതെന്നും ഡെമോക്രാറ്റുകൾ ആരോപിക്കുന്നു. ഇത് ഒരുതരം ജെറിമാൻഡറിങ് ആണെന്നും, വോട്ടർമാരെ സ്വാധീനിക്കാൻ വേണ്ടി അതിർത്തികൾ തങ്ങളുടെ രാഷ്ട്രീയ നേട്ടങ്ങൾക്കുവേണ്ടി വളച്ചൊടിച്ചുള്ള തീരുമാനമാണിതെന്നും അവർ വിമർശിച്ചു.
നോർത്ത് ടെക്സസ്, ഹ്യൂസ്റ്റൺ, സാൻ അന്റോണിയോ, ഓസ്റ്റിൻ, സൗത്ത് ടെക്സസ് എന്നീ മേഖലകളിലെ കോൺഗ്രസ് മണ്ഡലങ്ങളിലാണ് പുതിയ അതിർത്തി നിർണയം നടപ്പിലാകുക. ഈ നീക്കം നേരത്തെ നടന്നിരുന്നെങ്കിൽ 2024-ലെ തിരഞ്ഞെടുപ്പിൽ നോർത്ത് ടെക്സസിലെ ഫാർമേഴ്സ് ബ്രാഞ്ചിൽ ഡെമോക്രാറ്റ് ജൂലി ജോൺസനും, ഫോർട്ട് വർത്തിലെ മാർക്ക് വീസിക്കും വിജയിക്കാൻ സാധിക്കുമായിരുന്നില്ലെന്ന് റിപ്പബ്ലിക്കൻ പാർട്ടി ചൂണ്ടിക്കാട്ടുന്നു.
ടെക്സസ് ഗവർണർ ഗ്രെഗ് അബ്ബോട്ട് പ്രത്യേക താൽപര്യമെടുത്താണ് നിയമസഭയുടെ പ്രത്യേക സമ്മേളനത്തിൽ ഈ ബിൽ പാസാക്കിയതെന്നാണ് റിപ്പോർട്ടുകൾ സൂചിപ്പിക്കുന്നത്. പ്രസിഡന്റും ഈ നീക്കത്തെ പിന്തുണച്ചു. റീഡിസ്ട്രിക്ടിങ് നടപ്പിലായാൽ റിപ്പബ്ലിക്കൻ പാർട്ടിക്ക് അഞ്ച് സീറ്റുകൾ അധികമായി ലഭിക്കുമെന്ന് മുൻ പ്രസിഡന്റ് ട്രംപ് നേരത്തെ സൂചിപ്പിച്ചിരുന്നു. 2024-ലെ തിരഞ്ഞെടുപ്പ് ഫലങ്ങൾ വിശകലനം ചെയ്യുമ്പോൾ, നോർത്ത് ടെക്സസ്, ഹ്യൂസ്റ്റൺ, ഓസ്റ്റിൻ, സാൻ അന്റോണിയോ എന്നിവിടങ്ങളിൽ ഓരോ സീറ്റും സൗത്ത് ടെക്സസിൽ രണ്ട് സീറ്റുകളും ഡെമോക്രാറ്റുകൾക്ക് നഷ്ടപ്പെട്ടേക്കാം.
ബിൽ അവതരണ സമയത്ത്, കോറം തികയാത്തവിധം ഡെമോക്രാറ്റ് അംഗങ്ങൾ ടെക്സസ് വിട്ട് ഇല്ലിനോയ്, ന്യൂയോർക്ക്, മസാച്യുസെറ്റ്സ്, കാലിഫോർണിയ തുടങ്ങിയ സംസ്ഥാനങ്ങളിലേക്ക് പോയിരുന്നു. ഇത് വോട്ടെടുപ്പ് തടസ്സപ്പെടുത്തി. പിന്നീട് ഗവർണർ പുതിയ സമ്മേളനം വിളിച്ചതിന് ശേഷമാണ് മിക്ക ഡെമോക്രാറ്റിക് അംഗങ്ങളും തിരികെ എത്തിയത്. നിലവിൽ, ടെക്സസ് നിയമസഭയിൽ ഭരണ-പ്രതിപക്ഷ ഭിന്നത രൂക്ഷമാണ്.
Texas Redistricting Bill: A setback for Democrats? The bill has been passed by the Texas House of Representatives; now it needs Senate approval.
