വാഷിംഗ്ടൺ: ഡോണൾഡ് ട്രംപിനെതിരെ രണ്ട് കേസുകൾക്ക് നേതൃത്വം നൽകിയ മുൻ സ്പെഷ്യൽ പ്രോസിക്യൂട്ടർ ജാക്ക് സ്മിത്തിനെതിരെ യുഎസ് അധികൃതർ അന്വേഷണം ആരംഭിച്ചതായി റിപ്പോർട്ട്. നിയമവിരുദ്ധമായ രാഷ്ട്രീയ പ്രവർത്തനങ്ങൾ നടത്തിയെന്ന ആരോപണങ്ങളെ തുടർന്നാണ് സ്വതന്ത്ര ഫെഡറൽ ഏജൻസിയായ ഓഫീസ് ഓഫ് സ്പെഷ്യൽ കൗൺസിൽ (Office of Special Counsel) സ്മിത്തിനെതിരെ അന്വേഷണം ആരംഭിച്ചതെന്ന് അസോസിയേറ്റഡ് പ്രസ്, എൻബിസി ന്യൂസ് തുടങ്ങിയ യുഎസ് വാർത്താ ഏജൻസികൾ ശനിയാഴ്ച സ്ഥിരീകരിച്ചു.
തെളിവിന്റെ അഭാവത്തിൽ പോലും, ട്രംപും അദ്ദേഹത്തിന്റെ റിപ്പബ്ലിക്കൻ സഖ്യകക്ഷികളും, സെനറ്റർ ടോം കോട്ടൺ ഉൾപ്പെടെ, സ്മിത്ത് ഹാച്ച് ആക്റ്റ് ലംഘിച്ചതായി ആരോപിച്ചിരുന്നു. ചില പൊതു ഉദ്യോഗസ്ഥരെ രാഷ്ട്രീയ പ്രവർത്തനങ്ങളിൽ ഏർപ്പെടുന്നതിൽ നിന്ന് വിലക്കുന്ന ഒരു ഫെഡറൽ നിയമമാണ് ഹാച്ച് ആക്റ്റ്. ഈ ആഴ്ചയിലെ ഒരു സോഷ്യൽ മീഡിയ പോസ്റ്റിൽ, കോട്ടൺ സ്മിത്തിനെ 2024 ലെ യുഎസ് പ്രസിഡന്‍റ് തെരഞ്ഞെടുപ്പിന് മുന്നോടിയായി ട്രംപിനെതിരെ നിയമത്തെ ആയുധമാക്കിയ ഒരു പക്ഷപാതപരമായ ഡെമോക്രാറ്റ് എന്ന് വിശേഷിപ്പിച്ചു. തെരഞ്ഞെടുപ്പിനെ സ്വാധീനിക്കാൻ സാധ്യതയുള്ള അദ്ദേഹത്തിന്റെ നിയമവിരുദ്ധ പ്രവർത്തനങ്ങളെക്കുറിച്ച് അന്വേഷിക്കാൻ ഞാൻ ഓഫീസ് ഓഫ് സ്പെഷ്യൽ കൗൺസിലിനോട് ആവശ്യപ്പെട്ടിട്ടുണ്ട്,” കോട്ടൺ ബുധനാഴ്ച X-ൽ കുറിച്ചു.
2022 നവംബറിലാണ് അന്നത്തെ അറ്റോർണി ജനറൽ മെറിക് ഗാർലൻഡ് ട്രംപിനെതിരെ അന്വേഷിക്കാൻ സ്മിത്തിനെ സ്പെഷ്യൽ കൗൺസിലായി നിയമിച്ചത്. രഹസ്യ സർക്കാർ രേഖകൾ കൈകാര്യം ചെയ്തതുമായി ബന്ധപ്പെട്ടതും 2020 ലെ തെരഞ്ഞെടുപ്പ് ഫലം അട്ടിമറിക്കാനുള്ള ശ്രമങ്ങളെക്കുറിച്ചുള്ളതുമായ രണ്ട് ഫെഡറൽ കേസുകൾക്ക് അദ്ദേഹം നേതൃത്വം നൽകിയിരുന്നു. ഡെമോക്രാറ്റ് ജോ ബൈഡനോട് പരാജയപ്പെട്ട തെരഞ്ഞെടുപ്പായിരുന്നു ഇത്. തനിക്കെതിരെ രാഷ്ട്രീയ പ്രേരിതമായ പ്രോസിക്യൂഷൻ നടക്കുന്നുവെന്ന് ആരോപിച്ച് ട്രംപ് എല്ലാ കുറ്റങ്ങളും നിഷേധിച്ചിരുന്നു.
