തീവ്ര വലതുപക്ഷ പ്രവർത്തകനും അമേരിക്കൻ പ്രസിഡന്റ് ഡൊണാൾഡ് ട്രംപിന്റെ വിശ്വസ്തനുമായിരുന്ന ചാർളി കിർക്കിന്റെ അനുസ്മരണ ചടങ്ങ് ഞായറാഴ്ച അരിസോണയിലെ ഗ്ലെൻഡേലിലുള്ള സ്റ്റേറ്റ് ഫാം സ്റ്റേഡിയത്തിൽ നടന്നു. ഇലോൺ മസ്ക് അടക്കമുള്ള പ്രമുഖർ പങ്കെടുത്ത ഈ ചടങ്ങ് ആഗോള ശ്രദ്ധ നേടി, തുടർന്ന് നിരവധി വീഡിയോകൾ സാമൂഹ്യ മാധ്യമങ്ങളിൽ പ്രചരിച്ചു. എന്നാൽ, ചാർളി കിർക്കിന്റെ അനുസ്മരണ ഗാനത്തിനിടെ ട്രംപ് നടത്തിയ ‘വിചിത്ര നൃത്തം’ എന്ന പേര് നൽകപ്പെട്ട ഒരു വീഡിയോയാണ് ഇപ്പോൾ വലിയ തോതിൽ വൈറലായിരിക്കുന്നത്.
31-കാരനായ കിർക്ക് സെപ്റ്റംബർ 10-ന് യൂട്ടായിൽ നടന്ന ഒരു പൊതുപരിപാടിക്കിടെ വെടിയേറ്റ് കൊല്ലപ്പെട്ടിരുന്നു. ചടങ്ങിനിടെ, കിർക്കിന്റെ വിധവ എറിക്ക കിർക്കിനൊപ്പം വേദിയിൽ നിൽക്കവേ ട്രംപ് ഒരു ചെറിയ നൃത്തം ചെയ്യുകയും പെട്ടെന്ന് ഗൗരവഭാവം വീണ്ടെടുത്ത് നേരെ നിൽക്കുകയും ചെയ്തു. ഈ നിമിഷനേരത്തെ പ്രവൃത്തി സാമൂഹ്യ മാധ്യമങ്ങളിൽ വലിയ വിമർശനത്തിന് കാരണമായി. ട്രംപിന്റെ ഈ പെരുമാറ്റം കിർക്കിനോടും ആ സാഹചര്യത്തോടുമുള്ള അനാദരവും അനൗചിത്യവുമാണെന്നാണ് പ്രധാന വിമർശനം.
“ഇതൊരു തിരഞ്ഞെടുപ്പ് റാലിയല്ലെന്ന് അദ്ദേഹം മറന്നു,” എന്നും “പകൽ വെളിച്ചത്തിൽ വെടിയേറ്റ് മരിച്ച ഒരാളുടെ ഭാര്യയുടെ അരികിൽ നൃത്തം ചെയ്യുന്നത് ചിന്തിക്കാനാകില്ല,” എന്നും വിമർശകർ പറഞ്ഞു. ട്രംപിന്റെ അനുയായികൾ അദ്ദേഹത്തെ പിന്തുണച്ച് രംഗത്തെത്തി. ദുഃഖിതയായി നിന്ന എറിക്കയുടെ മുഖത്ത് ഒരു പുഞ്ചിരി കൊണ്ടുവരാനാണ് ട്രംപ് ശ്രമിച്ചതെന്നാണ് അവരുടെ വാദം. “ഇതൊരു പള്ളിയിലെ ശവസംസ്കാര ചടങ്ങായിരുന്നില്ല, കരിമരുന്ന് പ്രയോഗങ്ങളും സംഗീതവും അതിഥി പ്രഭാഷകരും ഉണ്ടായിരുന്ന ഒരു അനുസ്മരണ പരിപാടിയായിരുന്നു. ട്രംപ് അനുചിതമായി പെരുമാറിയിട്ടില്ല,” എന്ന് ഒരു അനുയായി വീഡിയോ പങ്കുവെച്ച് കുറിച്ചു. എന്നാൽ, വിമർശകർ ട്രംപിന്റെ പ്രവൃത്തിയെ രാഷ്ട്രീയ റാലിയുടെ ഭാഗമായി കാണുകയും എറിക്കയെ രാഷ്ട്രീയ ലക്ഷ്യങ്ങൾക്കായി ഉപയോഗിക്കുന്നതിന്റെ ഭാഗമായി വിലയിരുത്തുകയും ചെയ്തു.
“ഇത് കിർക്കിന്റെ അനുസ്മരണമല്ല, ഒരു രാഷ്ട്രീയ റാലിയാണ്. എറിക്ക ഇപ്പോൾ ട്രംപിന്റെ കളിയിലെ ഒരു കരു മാത്രമാണ്,” എന്ന് ഒരു വിമർശകൻ കുറിച്ചു. “മരിച്ച ഒരാളുടെ പ്രശസ്തി തട്ടിയെടുക്കാൻ ശ്രമിക്കുമ്പോൾ ഇത്തരം വിചിത്രമായ കാര്യങ്ങൾ ചെയ്യേണ്ടി വരും,” എന്നും മറ്റൊരാൾ കുറിപ്പിൽ വിമർശിച്ചു. ഈ വിവാദ വീഡിയോ സാമൂഹ്യ മാധ്യമങ്ങളിൽ വലിയ ചർച്ചകൾക്ക് വഴിവെച്ചിരിക്കുകയാണ്, ട്രംപിന്റെ പെരുമാറ്റം ഉചിതമായിരുന്നോ എന്നതിനെ ചൊല്ലി അനുകൂല-വിമർശന വാദങ്ങൾ ശക്തമാകുന്നു.
