വാഷിംഗ്ടൺ: 2019ൽ ഉത്തരകൊറിയൻ നേതാവ് കിം ജോങ് ഉന്നുമായി ഉന്നതതല ആണവ ചർച്ചകൾക്ക് ട്രംപ് തയ്യാറെടുക്കുന്നതിനിടെ, ഉത്തരകൊറിയയുടെ ആശയവിനിമയ സംവിധാനങ്ങൾ ചോർത്താൻ ശ്രമിച്ചതായി ന്യൂയോർക്ക് ടൈംസ് റിപ്പോർട്ട്. ഈ ദൗത്യം ദയനീയമായി പരാജയപ്പെട്ടു. ഉത്തരകൊറിയൻ നേതാവ് കിം ജോങ് ഉന്നിന്റെ ആശയവിനിമയങ്ങൾ ചോർത്തുന്നതിനായി ഒരു ഇലക്ട്രോണിക് ഉപകരണം സ്ഥാപിക്കാൻ ഡോണൾഡ് ട്രംപിന്റെ അനുമതിയോടെ 2019-ന്റെ തുടക്കത്തിൽ യുഎസ് നേവി സീൽ ടീം 6 ഉത്തരകൊറിയൻ മണ്ണിൽ ഒരു രഹസ്യ ദൗത്യം ആരംഭിച്ചു.
മാസങ്ങൾ നീണ്ട തയ്യാറെടുപ്പുകൾക്ക് ശേഷവും, നിരവധി കാരണങ്ങളാൽ ഉപകരണം സ്ഥാപിക്കുന്നതിന് മുൻപ് തന്നെ ദൗത്യം തകർന്നു. ദൗത്യം പരാജയപ്പെടാൻ മൂന്ന് പ്രധാന കാരണങ്ങളാണ് റിപ്പോർട്ട് ചൂണ്ടിക്കാണിക്കുന്നത്. അന്തർവാഹിനി വിന്യാസത്തിലെ നാവിഗേഷൻ പിഴവുകൾ, തത്സമയ വിവരങ്ങളുടെയും നിരീക്ഷണത്തിന്റെയും അഭാവം, സാധാരണക്കാരുമായുള്ള അപ്രതീക്ഷിത ഏറ്റുമുട്ടൽ എന്നിവയാണ് ഉത്തരകൊറിയയെക്കുറിച്ചുള്ള യുഎസ് രഹസ്യാന്വേഷണ വിവരങ്ങൾ മനസ്സിലാക്കാൻ ലക്ഷ്യമിട്ടുള്ള നിർണായക ദൗത്യത്തെ പരാജയപ്പെടുത്തിയത്.
