ലണ്ടൻ: യുകെ സർക്കാരിന്റെ കുടിയേറ്റ നയങ്ങൾക്കെതിരെ ഒരു ലക്ഷത്തിലധികം ആളുകൾ അണിനിരന്ന കുടിയേറ്റ വിരുദ്ധ റാലിയിൽ, ആക്രമണങ്ങളെ ശക്തമായി അപലപിച്ച് പ്രധാനമന്ത്രി കെയർ സ്റ്റാർമർ രംഗത്ത്. ദേശീയ പതാകയെ അക്രമത്തിന് മറയാക്കുന്ന തീവ്ര വലതുപക്ഷ പ്രകടനക്കാർക്ക് മുന്നിൽ ബ്രിട്ടൻ ഒരിക്കലും കീഴടങ്ങില്ലെന്നും, കുടിയേറ്റക്കാരോട് അനുകൂലമായ നിലപാടാണ് സർക്കാർ സ്വീകരിക്കുന്നതെന്നും അദ്ദേഹം വ്യക്തമാക്കി.
ശക്തമായ പ്രതിഷേധം
യുകെയുടെ ചരിത്രത്തിലെ ഏറ്റവും വലിയ വലതുപക്ഷ പ്രകടനങ്ങളിലൊന്നാണ് സെൻട്രൽ ലണ്ടനിൽ നടന്നത്. കുടിയേറ്റ വിരുദ്ധ പ്രവർത്തകനായ ടോമി റോബിൻസണിന്റെ നേതൃത്വത്തിൽ നടന്ന മാർച്ചിൽ ഒരു ലക്ഷത്തിലധികം പ്രതിഷേധക്കാർ പങ്കെടുത്തു. പ്രകടനത്തിനിടെ നിരവധി പോലീസ് ഉദ്യോഗസ്ഥരെ ആക്രമിച്ചതായി റിപ്പോർട്ടുകളുണ്ട്.
‘യുണൈറ്റ് ദി കിംഗ്ഡം’ എന്ന പേരിൽ നടന്ന ഈ മാർച്ചിൽ ഏകദേശം 110,000 പേർ പങ്കെടുത്തതായി പോലീസ് കണക്കാക്കുന്നു. അതേസമയം, റോബിൻസണിന്റെ റാലിക്ക് സമാന്തരമായി, ‘സ്റ്റാൻഡ് അപ്പ് ടു റേസിസം’ എന്ന പേരിൽ ഏകദേശം 5,000 പേർ പങ്കെടുത്ത മറ്റൊരു പ്രതിഷേധവും നടന്നു. ഇരുവിഭാഗങ്ങളും തമ്മിൽ സംഘർഷങ്ങളുണ്ടാകാതിരിക്കാൻ മെട്രോപൊളിറ്റൻ പോലീസിന് ദിവസം മുഴുവൻ പലവട്ടം ഇടപെടേണ്ടി വന്നു.
സംഘർഷാവസ്ഥ
പ്രകടനത്തിനിടെ പോലീസ് ഉദ്യോഗസ്ഥർക്ക് നേരെ ആക്രമണമുണ്ടായതിനെ തുടർന്ന് കൂടുതൽ സേനയെ വിന്യസിച്ചു. ക്രമസമാധാനം പുനഃസ്ഥാപിക്കുന്നതിനായി പ്രത്യേക ഉപകരണങ്ങൾ ധരിച്ച ഉദ്യോഗസ്ഥരെയും കുതിരപ്പടയെയും നിയോഗിച്ചു. ഈ പ്രതിഷേധങ്ങൾ യുകെയിൽ വേനൽക്കാലം മുഴുവൻ നടന്നുവരുന്ന കുടിയേറ്റ വിരുദ്ധ പ്രകടനങ്ങളുടെ തുടർച്ചയാണ്. കുടിയേറ്റക്കാർ താമസിക്കുന്ന ഹോട്ടലുകൾക്ക് പുറത്തും പ്രതിഷേധങ്ങൾ അരങ്ങേറി.
പ്രതിഷേധക്കാർ യൂണിയൻ പതാകയും ചുവപ്പും വെള്ളയും നിറങ്ങളിലുള്ള സെന്റ് ജോർജ് കുരിശും വീശി. ചിലർ അമേരിക്കൻ, ഇസ്രായേലി പതാകകളും ഉയർത്തി. അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ‘മേക്ക് അമേരിക്ക ഗ്രേറ്റ് എഗെയ്ൻ’ എന്ന മുദ്രാവാക്യം പതിച്ച തൊപ്പികളും പലരും ധരിച്ചിരുന്നു. ‘അവരെ വീട്ടിലേക്ക് അയക്കുക’ പോലുള്ള സന്ദേശങ്ങൾ അടങ്ങിയ പ്ലക്കാർഡുകളും ഉയർത്തി. പ്രധാനമന്ത്രി കെയർ സ്റ്റാർമറിനെ വിമർശിച്ചുകൊണ്ടുള്ള മുദ്രാവാക്യങ്ങളും പ്രതിഷേധക്കാർ വിളിച്ചു. ചിലർ കുട്ടികളേയും റാലിയിൽ പങ്കെടുപ്പിച്ചു.
Keir Starmer: I will never surrender to anti-immigration rally
