സുൽത്താൻ ബത്തേരിയിൽ അങ്കണവാടിയുടെ ഉദ്ഘാടനത്തിനെത്തിയ കോൺഗ്രസ് എംപി പ്രിയങ്കാ ഗാന്ധി, കുട്ടികൾക്ക് കളിപ്പാട്ടങ്ങൾ വാങ്ങാൻ ബത്തേരി ടൗണിലെ ഒരു കടയിൽ നേരിട്ടെത്തി. ഉദ്ഘാടന ചടങ്ങിനിടെ കുട്ടികളുമായി കുശലം പറഞ്ഞ അവർ, അവർക്കിഷ്ടപ്പെട്ട കളിപ്പാട്ടങ്ങളെക്കുറിച്ച് ചോദിച്ചറിഞ്ഞു. ഓരോ കുട്ടിയും പറഞ്ഞ ഇഷ്ടങ്ങൾ അവരുടെ പേര് സഹിതം കുറിച്ചുവെച്ച ശേഷം, പ്രിയങ്ക സ്വയം കടയിലെത്തി ആ കളിപ്പാട്ടങ്ങൾ തിരഞ്ഞെടുത്ത് കുട്ടികൾക്ക് എത്തിക്കാൻ നിർദേശം നൽകി.
അമ്പലവയൽ പഞ്ചായത്തിൽ നടന്ന അങ്കണവാടി ഉദ്ഘാടനത്തിന് ശേഷം, പ്രിയങ്ക യാക്കോബായ മെത്രാപ്പൊലീത്തയെ സന്ദർശിച്ചു. തുടർന്നാണ് ബത്തേരി ടൗണിലെ കളിപ്പാട്ടക്കടയിൽ അവർ എത്തിയത്. കുട്ടികൾ പറഞ്ഞ കളിപ്പാട്ടങ്ങൾ ശ്രദ്ധാപൂർവം തിരഞ്ഞെടുക്കുകയും അവ കുട്ടികൾക്ക് എത്തിക്കാൻ ഏർപ്പാട് ചെയ്യുകയും ചെയ്തു. കുട്ടികളോടൊപ്പം കളിച്ചും മിഠായി വിതരണം ചെയ്തും ഉല്ലാസത്തോടെ സമയം ചെലവഴിച്ചാണ് പ്രിയങ്ക അങ്കണവാടിയിൽ നിന്ന് മടങ്ങിയത്.
ഉദ്ഘാടന ചടങ്ങിൽ പ്രിയങ്കയോടൊപ്പം ജില്ലാ പഞ്ചായത്ത് പ്രസിഡന്റ് സംഷാദ് മരക്കാർ, ജില്ലാ പഞ്ചായത്ത് അംഗം സീത വിജയൻ, എം.യു. ജോർജ്, എം.സി. കൃഷ്ണകുമാർ, സി. ജെ. സെബാസ്റ്റ്യൻ, സി.ഡി.പി.ഒ. ആൻ ഡാർളി തുടങ്ങിയവർ പങ്കെടുത്തു. പ്രദേശവാസികളായ കുട്ടികൾ നാടൻ പാട്ടിനൊപ്പം ചേർന്ന് ആഘോഷത്തിൽ പങ്കാളികളായി.
