ബെൻസെൻ‌വിൽ: കുട്ടികളെയും സൈനികരെയും ലക്ഷ്യമിട്ട് വിതരണം ചെയ്യുന്ന അനധികൃത പുകയില ഉൽപ്പന്നങ്ങൾക്കെതിരെ അമേരിക്കയിൽ രാജ്യവ്യാപകമായി ഫെഡറൽ ഏജൻ്റുമാർ റെയ്ഡ് നടത്തി. 86 ദശലക്ഷം ഡോളറിലധികം (ഏകദേശം 715 കോടി രൂപ) വിലമതിക്കുന്ന അനധികൃത ഉൽപ്പന്നങ്ങൾ പിടിച്ചെടുത്തതായി നീതിന്യായ വകുപ്പ് അറിയിച്ചു.
”രാജ്യത്തുടനീളമുള്ള റീട്ടെയിൽ കടകളിൽ വിതരണം ചെയ്യുന്ന നിയമവിരുദ്ധമായ പുകയില ഉൽപ്പന്നങ്ങൾ പിടിച്ചെടുക്കാൻ നീതിന്യായ വകുപ്പ് രാജ്യവ്യാപകമായി ഒരു ഓപ്പറേഷൻ നടത്തി,” അറ്റോർണി ജനറൽ പാം ബോണ്ടി പത്രസമ്മേളനത്തിൽ പറഞ്ഞു. ഫുഡ് ആൻഡ് ഡ്രഗ് അഡ്മിനിസ്ട്രേഷനുമായി സഹകരിച്ചാണ് റെയ്ഡ് നടന്നത്. നോർത്ത് കരോലിന, അരിസോണ, ഇല്ലിനോയിസ്, ന്യൂജേഴ്സി, ജോർജിയ, ഫ്ലോറിഡ എന്നിവിടങ്ങളിലെ അഞ്ച് വിതരണക്കാരെയും അഞ്ച് റീട്ടെയിൽ സ്ഥാപനങ്ങളെയുമായിരുന്നു പ്രധാനമായും റെയ്ഡ് ചെയ്തത്.
ചൈനയിൽ നിന്ന് കടത്തിക്കൊണ്ടുവരുന്ന ഈ ഉൽപ്പന്നങ്ങൾക്ക് ആകർഷകമായ നിറങ്ങളും മധുരമുള്ള രുചികളുമുണ്ട്. ഇത് കുട്ടികളെയും യുവജനങ്ങളെയും ഇത്തരം ഉൽപ്പന്നങ്ങളിലേക്ക് ആകർഷിക്കുന്നതായി അധികാരികൾ പറയുന്നു. ഈ ഉൽപ്പന്നങ്ങൾ ആരോഗ്യത്തിന് ഹാനികരമാണെന്ന് ഫെഡറൽ സർക്കാർ പൊതുജനങ്ങൾക്ക് മുന്നറിയിപ്പ് നൽകി. അനധികൃത ഉൽപ്പന്നങ്ങളുടെ വിതരണം തടയാൻ വരും ദിവസങ്ങളിലും പരിശോധന തുടരുമെന്ന് അധികൃതർ വ്യക്തമാക്കി.
