വാഷിംഗ്ടൺ: രാഷ്ട്രീയ എതിരാളികൾക്കെതിരെ കേസെടുക്കുന്നതിൽ അറ്റോർണി ജനറൽ പാo ബോണ്ടി പരാജയപ്പെട്ടുവെന്ന് ആരോപിച്ച് മുൻ യുഎസ് പ്രസിഡന്റ് ഡൊണാൾഡ് ട്രംപ് രംഗത്ത്. ചില അന്വേഷണങ്ങളിൽ ബോണ്ടി വേണ്ടത്ര നടപടികൾ സ്വീകരിക്കുന്നില്ലെന്ന് ചൂണ്ടിക്കാട്ടിയാണ് ട്രംപ് വിമർശനം ഉന്നയിച്ചത്. എന്നാൽ, മണിക്കൂറുകൾക്ക് ശേഷം ബോണ്ടിയെ പിന്തുണച്ചുകൊണ്ടുള്ള ട്രംപിന്റെ പുതിയ പ്രസ്താവന രാഷ്ട്രീയ നിരീക്ഷകരെ അമ്പരിപ്പിച്ചു.
‘ഇനിയും വൈകിക്കാനാകില്ല’
സോഷ്യൽ മീഡിയയിൽ നടത്തിയ ആദ്യ പോസ്റ്റിൽ, നീതിന്യായ വകുപ്പിന്റെ അധികാരം കൂടുതൽ കർശനമായി ഉപയോഗിക്കണമെന്ന് ട്രംപ് ബോണ്ടിയോട് ആവശ്യപ്പെട്ടു. “പാo: ഇതും പഴയ കഥ തന്നെ, വെറും വാചകക്കസർത്ത് മാത്രം, ഒരു നടപടിയുമില്ല. കോമി, ആദം ഷിഫ്, ലെറ്റിഷ്യ എന്നിവരെ എന്തു ചെയ്യും? അവർ കുറ്റക്കാരാണ്, പക്ഷെ ഒന്നും സംഭവിക്കുന്നില്ല,” ട്രംപ് രോഷം പ്രകടിപ്പിച്ചു.
മുൻ എഫ്ബിഐ ഡയറക്ടർ ജെയിംസ് കോമി, കാലിഫോർണിയ സെനറ്റർ ആദം ഷിഫ്, ന്യൂയോർക്ക് അറ്റോർണി ജനറൽ ലെറ്റിഷ്യ ജെയിംസ് എന്നിവരെയാണ് ട്രംപ് ഇതിലൂടെ ലക്ഷ്യമിട്ടത്. “നമുക്ക് ഇനിയും വൈകിക്കാനാകില്ല. ഇത് നമ്മുടെ പ്രതിച്ഛായയെയും വിശ്വാസ്യതയെയും ബാധിക്കും,” ട്രംപ് കൂട്ടിച്ചേർത്തു. എന്നാൽ, ഇതിനു പിന്നാലെ ട്രംപ് ബോണ്ടിയെ പിന്തുണച്ച് രംഗത്തെത്തിയത് അദ്ദേഹത്തിന്റെ നിലപാടുകൾ കൂടുതൽ ആശയക്കുഴപ്പത്തിലാക്കി.
