വാഷിംഗ്ടൺ: ചൈനയുടെ ഏറ്റവും വലിയ സൈനിക പരേഡിൽ പ്രസിഡന്റ് ഷി ജിൻപിംഗ്, റഷ്യൻ പ്രസിഡന്റ് വ്ളാഡിമിർ പുടിൻ, ഉത്തര കൊറിയൻ നേതാവ് കിം ജോങ് ഉൻ എന്നിവർ ഒരുമിച്ച് പങ്കെടുത്തതിന് പിന്നാലെ രൂക്ഷവിമർശനവുമായി മുൻ യുഎസ് പ്രസിഡന്റ് ഡോണാൾഡ് ട്രംപ് രംഗത്ത്. രണ്ടാം ലോക മഹായുദ്ധത്തിൽ ജപ്പാൻ കീഴടങ്ങിയതിൻ്റെ 80-ാം വാർഷിക ആഘോഷത്തിനിടെയാണ് ട്രംപ് ചൈനയെ കടന്നാക്രമിച്ചത്.
തന്റെ സോഷ്യൽ മീഡിയ പ്ലാറ്റ്ഫോമിലൂടെയാണ് ട്രംപ് ചൈനീസ് ഭരണകൂടത്തിനെതിരെ ഗുരുതരമായ ആരോപണം ഉന്നയിച്ചത്. പ്രസിഡന്റ് ഷി ജിൻപിംഗും മറ്റ് രണ്ട് നേതാക്കളും ചേർന്ന് അമേരിക്കയ്ക്കെതിരെ ഗൂഢാലോചന നടത്തുകയാണെന്ന് ട്രംപ് കുറിച്ചു.
“പ്രസിഡന്റ് ഷിക്കും ചൈനയിലെ അത്ഭുതകരമായ ജനങ്ങൾക്കും മഹത്തായതും ശാശ്വതവുമായ ഒരു ആഘോഷദിനം ആശംസിക്കുന്നു. നിങ്ങൾ അമേരിക്കയ്ക്കെതിരെ ഗൂഢാലോചന നടത്തുമ്പോൾ എൻ്റെ ഊഷ്മളമായ ആശംസകൾ വ്ളാഡിമിർ പുടിനും കിം ജോങ് ഉന്നിനും നൽകുക,” ട്രംപ് പരിഹാസരൂപേണ എഴുതി.
രണ്ടാം ലോക മഹായുദ്ധത്തിൽ അമേരിക്കയുടെ പങ്കാളിത്തത്തെക്കുറിച്ച് ട്രംപ് തൻ്റെ പോസ്റ്റിൽ പരാമർശിച്ചു. “ചൈനയുടെ സ്വാതന്ത്ര്യത്തിന് വേണ്ടി പോരാടാൻ അമേരിക്ക നൽകിയ വലിയ പിന്തുണയും രക്തവും പ്രസിഡന്റ് ഷി ഓർക്കുമോ എന്നതാണ് വലിയ ചോദ്യം,” ട്രംപ് ചോദിച്ചു. “ചൈനയുടെ വിജയത്തിനും മഹത്വത്തിനും വേണ്ടിയുള്ള പോരാട്ടത്തിൽ നിരവധി അമേരിക്കക്കാർ മരിച്ചു. അവരുടെ ധീരതയും ത്യാഗവും അംഗീകരിക്കുകയും ഓർമ്മിക്കപ്പെടുകയും ചെയ്യുമെന്ന് ഞാൻ പ്രതീക്ഷിക്കുന്നു!” എന്നും ട്രംപ് കൂട്ടിച്ചേർത്തു. മൂന്ന് ലോക നേതാക്കളുടെയും ഈ കൂടിക്കാഴ്ചയെ അമേരിക്ക സംശയത്തോടെയാണ് കാണുന്നതെന്നതിൻ്റെ സൂചന കൂടിയാണ് ട്രംപിൻ്റെ ഈ പ്രസ്താവന.
