വാഷിംഗ്ടൺ: യുഎസ് പ്രസിഡന്റ് ഡോണൾഡ് ട്രംപ് ഈ ആഴ്ച മുതിർന്ന ജനറൽമാരുടെയും അഡ്മിറൽമാരുടെയും ഒരു അപ്രതീക്ഷിത യോഗത്തിൽ പങ്കെടുക്കാൻ ഒരുങ്ങുന്നതായി റിപ്പോർട്ട്. സൈനിക ഉദ്യോഗസ്ഥർക്കുള്ള ‘പ്രചോദനം’ എന്ന് വിശേഷിപ്പിക്കപ്പെടുന്ന ഈ കൂടിക്കാഴ്ചയ്ക്ക് ട്രംപിന്റെ പങ്കാളിത്തം പുതിയ മാനം നൽകും.
വിർജീനിയയിൽ ചൊവ്വാഴ്ച നടക്കാനിരിക്കുന്ന ഈ യോഗം യഥാർത്ഥത്തിൽ സംഘടിപ്പിച്ചത്, പ്രതിരോധ സെക്രട്ടറി പീറ്റ് ഹെഗ്സെത്ത് ആയിരുന്നു.
ഭരണകൂടം പ്രതിരോധ വകുപ്പിനെ (Department of Defense) ‘യുദ്ധ വകുപ്പ്’ (Department of War) ആയി എങ്ങനെ പരിവർത്തനം ചെയ്യുമെന്നും സൈനിക ഉദ്യോഗസ്ഥർക്കുള്ള പുതിയ മാനദണ്ഡങ്ങൾ എന്തായിരിക്കുമെന്നും വിശദീകരിക്കാനാണ് ഈ യോഗം ആദ്യം പദ്ധതിയിട്ടിരുന്നത്. എൻബിസി ന്യൂസിന് നൽകിയ ഫോൺ അഭിമുഖത്തിൽ ട്രംപ് ഈ കൂടിക്കാഴ്ചയെ ‘എസ്പ്രിറ്റ് ഡി കോർപ്സ്’ (Esprit de corps – സൈനികരുടെ മനോവീര്യം) എന്ന് വിശേഷിപ്പിച്ചു.
“നമ്മൾ സൈനികമായി എത്ര നന്നായി പ്രവർത്തിക്കുന്നു, മികച്ച അവസ്ഥയിലാണ്, നല്ലതും പോസിറ്റീവുമായ നിരവധി കാര്യങ്ങൾ എന്നിവയെക്കുറിച്ച് സംസാരിക്കുന്ന മനോഹരമായ ഒരു യോഗമാണിത്,” ട്രംപ് പറഞ്ഞു. “മികച്ച ചില വ്യക്തികൾ പങ്കെടുക്കുന്നുണ്ടെന്നും അദ്ദേഹം കൂട്ടിച്ചേര്ത്തു.
