ഇന്ത്യ റഷ്യയിൽനിന്ന് എണ്ണ വാങ്ങുന്നത് നിർത്തി അമേരിക്കൻ ക്രൂഡ് ഓയിലിനും പെട്രോളിയം ഉൽപ്പന്നങ്ങൾക്കും വിപണി തുറക്കണമെന്ന് യുഎസ് ആവശ്യപ്പെട്ടു. ഇന്ത്യയിലെ അടുത്ത യുഎസ് അംബാസഡറായി നിയുക്തനായ സെർജിയോ ഗോർ, ഡൊണാൾഡ് ട്രംപിന്റെ നിലപാട് വ്യക്തമാക്കി. ക്രൂഡ് ഓയിൽ, പെട്രോളിയം ഉൽപ്പന്നങ്ങൾ, എൽഎൻജി എന്നിവയ്ക്കായി ഇന്ത്യൻ വിപണിയിൽ പ്രവേശനം ലഭിക്കാൻ യുഎസ് ലക്ഷ്യമിടുന്നതായി ഗോർ പറഞ്ഞു. “ഇന്ത്യൻ വിപണി തുറക്കുന്നതിലൂടെ ഞങ്ങളുടെ ഉൽപ്പന്നങ്ങൾക്ക് അനന്തമായ സാധ്യതകളുണ്ട്,” അദ്ദേഹം കൂട്ടിച്ചേർത്തു.
നിലവിലെ വ്യാപാര ചർച്ചകളിലൂടെ ഇന്ത്യയെ റഷ്യൻ എണ്ണയിൽനിന്ന് അകറ്റി അമേരിക്കൻ ഉൽപ്പന്നങ്ങൾക്ക് അവസരമൊരുക്കാനാണ് യുഎസ് ശ്രമിക്കുന്നത്. ഇന്ത്യയും ചൈനയും തമ്മിലുള്ള ബന്ധത്തെക്കാൾ ഊഷ്മളമായ ഒരു ബന്ധം ഇന്ത്യയുമായി സ്ഥാപിക്കാൻ യുഎസ് ശ്രമിക്കുന്നുണ്ടെന്ന് ഗോർ സൂചിപ്പിച്ചു. ഇന്ത്യയെ ചൈനയുടെ സ്വാധീനത്തിൽനിന്ന് അകറ്റി യുഎസിന്റെ പക്ഷത്തേക്ക് കൊണ്ടുവരിക എന്നത് ഒരു പ്രധാന മുൻഗണനയാണെന്നും അദ്ദേഹം വ്യക്തമാക്കി.
പ്രധാനമന്ത്രി നരേന്ദ്ര മോദിയുമായി ട്രംപിന് ഗാഢമായ സൗഹൃദമുണ്ടെന്നും ഗോർ അവകാശപ്പെട്ടു. വ്യാപാര വിഷയങ്ങളിൽ ഇന്ത്യയെ വിമർശിക്കുമ്പോഴും മോദിയെ ട്രംപ് പ്രത്യേകം അഭിനന്ദിക്കാറുണ്ടെന്ന് അദ്ദേഹം പറഞ്ഞു. ഈ സൗഹൃദവും വ്യാപാര ചർച്ചകളും ഉപയോഗിച്ച് ഇന്ത്യ-യുഎസ് ബന്ധം കൂടുതൽ ശക്തമാക്കാനും റഷ്യ-ചൈന സഖ്യത്തിൽനിന്ന് ഇന്ത്യയെ അകറ്റാനുമാണ് യുഎസിന്റെ ശ്രമം.
