തൃശൂർ ഡിഐജി ഓഫീസിന് മുമ്പിൽ പോലീസിന്റെ കസ്റ്റഡി മർദനത്തിനെതിരെ യൂത്ത് കോൺഗ്രസ് ‘കൊലച്ചോറ് സമര’വുമായി പ്രതിഷേധിച്ചു. കുന്നംകുളത്ത് കോൺഗ്രസ് പ്രവർത്തകനായ സുജിത്തിന് നേരിടേണ്ടിവന്ന ക്രൂരമർദനത്തിൽ പ്രതിഷേധിച്ചാണ് ഈ പ്രതീകാത്മക സമരം. പൊലീസ് വേഷം ധരിച്ചും മർദനം നടത്തിയ പൊലീസുകാരുടെ മുഖംമൂടി ധരിച്ചും പ്രവർത്തകർ സമരം വേറിട്ടതാക്കി. ബാരിക്കേഡിന് സമീപം ഇലയിട്ട് നടത്തിയ പ്രതിഷേധം ശ്രദ്ധേയമായി.
2023 ഏപ്രിൽ 5-ന് സുജിത്തിന് കസ്റ്റഡിയിൽ മർദനം നേരിട്ടിരുന്നു. രണ്ടുവർഷത്തെ നിയമപോരാട്ടത്തിനൊടുവിൽ വിവരാവകാശ കമ്മീഷന്റെ ഉത്തരവ് പ്രകാരം മർദന ദൃശ്യങ്ങൾ ലഭിച്ചു. സുജിത്തിനെ മർദിച്ച അഞ്ച് പൊലീസുകാർക്കെതിരെ നടപടി ആവശ്യപ്പെട്ടാണ് സമരം. വഴിയരികിൽ നിന്ന സുഹൃത്തുക്കളെ പൊലീസ് ഭീഷണിപ്പെടുത്തുന്നത് കണ്ട് കാരണം തിരക്കാൻ ശ്രമിച്ചതാണ് സുജിത്തിനെ മർദനത്തിന് ഇരയാക്കിയത്.
