വാഷിംഗ്ടൺ: ഫെഡറൽ സർക്കാർ ഷട്ട്ഡൗൺ മൂലം എയർ ട്രാഫിക് കൺട്രോളർമാർക്ക് ആദ്യത്തെ പൂർണ ശമ്പളവും നഷ്ടമായതോടെ, ജീവനക്കാരുടെ കുറവ് ഉണ്ടായതായി ഫെഡറൽ ഏവിയേഷൻ അഡ്മിനിസ്‌ട്രേഷൻ റിപ്പോർട്ട് ചെയ്തു. അറ്റ്ലാന്‍റയിലെ ഹാർട്ട്‌സ്‌ഫീൽഡ്-ജാക്‌സൺ ഇന്‍റർനാഷണൽ എയർപോർട്ടിലേക്കും നെവാർക്ക് ലിബർട്ടി ഇന്‍റർനാഷണൽ എയർപോർട്ടിലേക്കും വരുന്നതും പോകുന്നതുമായ വിമാനങ്ങൾ കൈകാര്യം ചെയ്യുന്ന ട്രേക്കോൺ സൗകര്യങ്ങളിലാണ് ജീവനക്കാരുടെ കുറവ് അനുഭവപ്പെട്ടത്.
രാവിലെ 8 മണിക്ക് പുറത്തിറക്കിയ ഓപ്പറേഷൻസ് പ്ലാൻ പ്രകാരം നെവാർക്കിലെ കുറവ് 10 മണി വരെയും അറ്റ്ലാൻ്റയിലെ കുറവ് ഉച്ചയ്ക്ക് 12 മണി വരെയും തുടർന്നു. ഒക്ടോബർ ഒന്നിന് ഷട്ട്ഡൗൺ തുടങ്ങിയ ശേഷം ജീവനക്കാരുടെ കുറവ് റിപ്പോർട്ട് ചെയ്യപ്പെട്ട സംഭവങ്ങളുടെ എണ്ണം 274 ആയി ഉയർന്നു. കഴിഞ്ഞ വർഷം ഇതേ സമയത്ത് റിപ്പോർട്ട് ചെയ്യപ്പെട്ടതിന്‍റെ നാലിരട്ടിയിലധികമാണ് ഇത്. ഹാലോവീൻ അവധി വാരാന്ത്യത്തിലേക്ക് രാജ്യം പ്രവേശിക്കുമ്പോഴാണ് ഈ പ്രതിസന്ധി. ഷട്ട്ഡൗണിന് മുമ്പ് ജോലി ചെയ്ത സമയത്തിനുള്ള ശമ്പളത്തിന്‍റെ ഭാഗമായി കൺട്രോളർമാർക്ക് രണ്ടാഴ്ച മുമ്പ് ഭാഗിക ശമ്പളം ലഭിച്ചിരുന്നു.
ജീവനക്കാരുടെ കുറവ് എപ്പോഴും വിമാനങ്ങൾ വൈകുന്നതിന് കാരണമാകണമെന്നില്ല. സുരക്ഷ ഉറപ്പാക്കാൻ കൺട്രോളർമാർക്ക് വിമാനങ്ങളുടെ പാത മാറ്റാൻ കഴിയുമെങ്കിലും, ചിലപ്പോൾ വേഗത കുറയ്ക്കുകയോ വൈകിപ്പിക്കുകയോ ചെയ്യേണ്ടി വരും. കൺട്രോളർമാർക്ക് ശമ്പളം ലഭിക്കുന്നില്ലെങ്കിലും, അവർ അത്യാവശ്യ ജീവനക്കാരായി കണക്കാക്കപ്പെടുന്നതിനാൽ ഷട്ട്ഡൗൺ കാലത്തും ജോലിക്ക് ഹാജരാകേണ്ടതുണ്ട്. പ്രതിഷേധത്തിന്‍റെ ഭാഗമായി ചിലർ അവധിയെടുക്കുകയാണെന്നും മറ്റ് ചിലർ പണം സമ്പാദിക്കാൻ മറ്റ് ജോലികൾക്കായി സമയം കണ്ടെത്തുകയാണെന്നും ഗതാഗത സെക്രട്ടറി ഷോൺ ഡഫി പറഞ്ഞു.
