ജെയിംസ് കൂടല്‍
കേരളം രാഷ്ട്രീയബോധമുള്ള ഒരു സമൂഹമാണ്. സ്‌കൂളുകള്‍, കോളേജുകള്‍, ചായക്കടകള്‍, നാട്ടുവഴികള്‍ എന്നിങ്ങനെ ഓരോ മുക്കിലും മൂലയിലും രാഷ്ട്രീയ ചര്‍ച്ചകള്‍ നടക്കുന്നത് നമ്മുടെ സംസ്‌കാരത്തിന്റെ ഭാഗമാണ്. ഈ ബോധമാണ് വര്‍ഷങ്ങളായി കേരളത്തെ സാമൂഹികമായി മുന്നോട്ടു കൊണ്ടുപോയതും. എന്നാല്‍ കാലാകാലങ്ങളായി വന്ന മാറ്റങ്ങളില്‍ ചിലതിലേക്ക് നാം ശ്രദ്ധ തിരിക്കേണ്ട സമയം അതിക്രമിച്ചിരിക്കുന്നു.
യുവാക്കളുടെ രാഷ്ട്രീയ പ്രവേശനത്തിന്റെ പല വശങ്ങളെ പറ്റി തുറന്ന ചര്‍ച്ച ആവശ്യമായ കാലഘട്ടമാണിത്. പല യുവാക്കളും തൊഴിലും ജീവിതവും രൂപപ്പെടുന്നതിനു മുമ്പ് തന്നെ പൂര്‍ണ്ണ സമയം രാഷ്ട്രീയത്തില്‍ പ്രവേശിക്കുന്നു. രാഷ്ട്രീയം ഒരു തൊഴില്‍ അല്ല, മറിച്ച് ഒരു സേവനമാണ് എന്ന വസ്തുത അവര്‍ മറക്കുന്നു
രാഷ്ട്രീയത്തിന്റെ ആത്മാവ് ജനസേവനം തന്നെയാണ്. പക്ഷേ, തൊഴില്‍ ഇല്ലാതെ, സ്വന്തം ജീവിതത്തിന് അടിത്തറ ഇല്ലാതെ, രാഷ്ട്രീയത്തിലേക്ക് പ്രവേശിക്കുമ്പോള്‍ യുവാക്കള്‍ക്ക് സംഭവിക്കുന്നത് വലിയ വീഴ്ചകളും നഷ്ടങ്ങളുമാണ്. പാര്‍ട്ടി ആശ്രിതത്വം, വ്യക്തിത്വ നഷ്ടം, സാമ്പത്തിക അസുരക്ഷ, നേതാക്കളോട് അന്ധമായ വിധേയത്വം, സ്വന്തം സ്വപ്നങ്ങളും കഴിവുകളും നഷ്ടപ്പെടുക എന്നിങ്ങനെ നീളുന്നു ആ പട്ടിക. ഇതിനെയൊക്കെ മുതലെടുക്കുന്ന രാഷ്ട്രീയ പാര്‍ട്ടികള്‍ യുവാക്കളിലേക്ക് അന്ധമായ ആത്മവിശ്വാസമാണ് നിറയ്ക്കുന്നത്.
ജീവിതത്തിന് അടിത്തറയും സ്വന്തമായൊരു തൊഴിലും എന്തുകൊണ്ട് വേണം എന്നതിന്റെ പ്രസക്തി യുവാക്കള്‍ തിരിച്ചറിയണം. തൊഴില്‍ ഉള്ള ഒരു യുവാവിന് സാമ്പത്തിക സ്വാതന്ത്ര്യം, സ്വാഭിമാനം, സ്വന്തം നിലപാട് പറയാനുള്ള ധൈര്യം, ജീവിതത്തെക്കുറിച്ചുള്ള യാഥാര്‍ത്ഥ്യബോധം, ജനങ്ങളുടെ പ്രശ്‌നങ്ങള്‍ മനസിലാക്കാനുള്ള കഴിവ് എന്നിവയൊക്കെ തനിയെ വന്നുചേരും. ഇങ്ങനെയുള്ളവര്‍ക്ക് നല്ല നേതാക്കളാകാനും സാധിക്കും. കാരണം, രാഷ്ട്രീയത്തില്‍ ആശ്രിതരാകാതെ ജനങ്ങള്‍ക്ക് വേണ്ടിയാണ് അവര്‍ നില്‍ക്കുന്നത്.
ലോകം മാറ്റിമറിച്ച നേതാക്കളില്‍ പലരും അഭിഭാഷകരും അധ്യാപകരും ഡോക്ടര്‍മാരും എഴുത്തുകാരും വ്യവസായികളും ഒക്കെ ആയിരുന്നുവെന്ന് ചരിത്രം നമ്മെ പഠിപ്പിച്ചിട്ടുണ്ട്. അവരുടെ ജീവിതപരിചയം ആണ് അവരുടെ നേതൃത്വശേഷിയെ വളര്‍ത്തിയത്. ജീവിതപരിചയമില്ലാതെ, സാമ്പത്തിക സ്വാതന്ത്ര്യമില്ലാതെ രാഷ്ട്രീയത്തിലേക്ക് വരുമ്പോള്‍, ഒരാള്‍ നേതാവല്ല, ആജ്ഞാനുസരണക്കാരന്‍ മാത്രമാകും.
സമൂഹസേവനത്തിന് മുന്‍ഗണന കൊടുക്കുന്ന യുവജന രാഷ്ട്രീയത്തില്‍ വലിയ മാറ്റങ്ങള്‍ ഉണ്ടാവേണ്ടതുണ്ട്. നവീന ആശയങ്ങളും സ്റ്റാര്‍ട്ടപ്പുകളും അവര്‍ പ്രോത്സാഹിപ്പിക്കണം. ക്ലാസ്റൂമും ചര്‍ച്ചകളും ആശയവിനിമയത്തിന്റെ കേന്ദ്രമാക്കുക, അനാവശ്യ സംഘര്‍ഷങ്ങള്‍ ഒഴിവാക്കുക എന്നതൊക്കെ വഴി പുതിയ ചരിത്രം കുറിക്കാന്‍ കേരളത്തിലെ യുവതലമുറയ്ക്ക് സാധിക്കുമെന്നതില്‍ സംശയമില്ല.
കേരളത്തിന്റെ ഭാവി യുവാക്കളുടെ കൈയിലാണ്. സ്വന്തം കാലില്‍ നിന്നതിനു ശേഷം പൊതുജീവിതം സേവന മനോഭാവത്തോടെ സമീപിക്കുക. സ്വയം നിലകൊള്ളുന്നവര്‍ക്ക് മാത്രമേ മറ്റുള്ളവരെ ഉയര്‍ത്താന്‍ കഴിയൂ. രാഷ്ട്രീയം സേവനത്തിന്റെ വേദി ആയിരിക്കണം, ജീവിതത്തില്‍ പരാജയപ്പെട്ടവര്‍ക്കുള്ള ഒളിവിടം ആകരുത്!
Changing times, changing politics; Farewell to young political workers!
