ബീജിങ്/തായ്‌പേയ്: യുഎസ് പ്രസിഡന്റ് ഡോണൾഡ് ട്രംപും ചൈനീസ് പ്രസിഡന്റ് ഷി ജിൻപിങും തമ്മിലുള്ള കൂടിക്കാഴ്ച അടുത്തിരിക്കെ, ചൈന തായ്‌വാനു സമീപം എച്ച്-6കെ (H-6K) സ്ട്രാറ്റജിക് ബോംബറുകൾ ഉപയോഗിച്ച് ഏറ്റുമുട്ടൽ പരിശീലനങ്ങൾ നടത്തിയതായി ചൈനീസ് സർക്കാർ മാധ്യമങ്ങൾ റിപ്പോർട്ട് ചെയ്തു. തായ്‌വാനെ ലക്ഷ്യമിട്ടുള്ള ഈ സൈനിക നീക്കം മേഖലയിൽ വീണ്ടും സംഘർഷം വർദ്ധിപ്പിച്ചു. “ഒന്നിലധികം എച്ച്-6കെ ബോംബറുകൾ തായ്‌വാന് ചുറ്റുമുള്ള സമുദ്രമേഖലയിലും വ്യോമാതിർത്തിയിലും എത്തി സിമുലേറ്റഡ് ഏറ്റുമുട്ടൽ പരിശീലനങ്ങൾ നടത്തിയെന്ന് റിപ്പോർട്ടിൽ പറയുന്നു. കൂടാതെ, നിരവധി ജെ-10 (J-10) യുദ്ധവിമാനങ്ങൾ പോരാട്ട രൂപീകരണത്തിൽ പറന്നു എന്നും റിപ്പോർട്ടിലുണ്ട്.
ആണവായുധങ്ങൾ വഹിക്കാൻ ശേഷിയുള്ള ബോംബറുകളാണ് എച്ച്-6കെ. തീയതി വ്യക്തമാക്കാതെയാണ് റിപ്പോർട്ട് പുറത്തുവിട്ടതെങ്കിലും, തായ്‌വാന്‍റെ പ്രവർത്തനങ്ങൾക്ക് ഉത്തരവാദികളായ ചൈനീസ് സൈന്യത്തിന്‍റെ ഈസ്റ്റേൺ തിയേറ്റർ കമാൻഡ് എയർഫോഴ്സ് യൂണിറ്റുകളാണ് ഈ പരിശീലനം നടത്തിയത്. രഹസ്യാന്വേഷണം, മുൻകൂർ മുന്നറിയിപ്പുകൾ, വ്യോമ ഉപരോധങ്ങൾ, പ്രധാന മേഖലകളിലെ കൃത്യമായ ആക്രമണങ്ങൾ എന്നിവ കേന്ദ്രീകരിച്ചായിരുന്നു പരിശീലനം.
ജെ-10 യുദ്ധവിമാനങ്ങൾ പറന്നുയരുന്നതിന്‍റെയും എച്ച്-6 ബോംബറുകൾ മിസൈലുകൾ പുറത്തുവിടുന്നതിന്‍റെയും ദൃശ്യങ്ങൾ ചൈനീസ് സ്റ്റേറ്റ് ടെലിവിഷന്‍റെ സൈനിക ചാനൽ സംപ്രേക്ഷണം ചെയ്തു. ഒരു ചൈനീസ് സൈനികൻ തായ്‌വാന്‍റെ തീരരേഖ ആകാശത്ത് നിന്ന് വ്യക്തമായി കാണാം എന്ന് പറയുന്നതും റിപ്പോർട്ടിലുണ്ടായിരുന്നു.
തായ്‌വാന്‍റെ വ്യോമാതിർത്തിക്ക് ചുറ്റുമുള്ള ചൈനീസ് സൈനിക പ്രവർത്തനങ്ങളെക്കുറിച്ച് തായ്‌വാൻ പ്രതിരോധ മന്ത്രാലയം ദിവസേന വിവരങ്ങൾ പുറത്തുവിടാറുണ്ട്. തിങ്കളാഴ്ച രാവിലെ, നാല് ചൈനീസ് വിമാനങ്ങൾ കണ്ടെത്തിയതായി മന്ത്രാലയം അറിയിച്ചു, എന്നാൽ അസ്വാഭാവികമായതൊന്നും സംഭവിച്ചില്ലെന്ന് കൂട്ടിച്ചേർത്തു.
