കാസർകോട് അനന്തപുരിയിലെ പ്ലൈവുഡ് ഫാക്ടറിയിൽ ഉണ്ടായ ശക്തമായ സ്ഫോടനത്തിൽ ഒരു തൊഴിലാളി മരിച്ചു. ഫാക്ടറിയിലെ ബോയിലർ പൊട്ടിത്തെറിച്ചതാണ് അപകടത്തിന് കാരണമെന്നാണ് പ്രാഥമിക നിഗമനം. സ്ഫോടനത്തിന്റെ ആഘാതത്തിൽ സമീപത്തെ വീടുകളുടെ ജനൽച്ചില്ലുകൾ തകർന്നു. ഇതര സംസ്ഥാന തൊഴിലാളികളാണ് അപകടത്തിൽപ്പെട്ടവരിൽ ഭൂരിഭാഗവും. പരുക്കേറ്റവരെ മംഗളൂരുവിലെ ആശുപത്രിയിൽ പ്രവേശിപ്പിച്ചിട്ടുണ്ട്, അവരിൽ ചിലരുടെ നില ഗുരുതരമാണ്.
അഗ്നിരക്ഷാ സേന സ്ഥലത്തെത്തി തീ നിയന്ത്രണ വിധേയമാക്കിയെങ്കിലും, ഫാക്ടറിയിൽ നിന്ന് ശക്തമായ പുക ഉയരുന്നത് തുടരുകയാണ്. സ്ഫോടനത്തെത്തുടർന്ന് നാട്ടുകാർ സ്ഥലത്ത് തടിച്ചുകൂടി, പ്രദേശത്ത് ആശങ്ക നിലനിൽക്കുകയാണ്. അപകടത്തിന്റെ കാരണം കണ്ടെത്താൻ അന്വേഷണം ആരംഭിച്ചതായി പൊലീസ് അറിയിച്ചു.
