വാഷിംഗ്ടൺ: വെനസ്വേലയിൽ സൈനിക നടപടിക്ക് യുഎസ് പ്രസിഡൻ്റ് ഡോണൾഡ് ട്രംപ് ഒരുങ്ങുന്ന സാഹചര്യത്തിൽ, വെനസ്വേലൻ പ്രസിഡൻ്റ് നിക്കോളാസ് മഡുറോ ശക്തമായി പ്രതികരിക്കുന്നു. ഈ ആഴ്ച കരീബിയൻ മേഖലയിൽ യുഎസ് സൈന്യം ശക്തിപ്പെടുത്തുകയും രാജ്യത്തിൻ്റെ തീരത്തുകൂടി ബി-52 ബോംബറുകൾ പറത്തുകയും ചെയ്തതോടെയാണ് ഇരു നേതാക്കളും തമ്മിലുള്ള പോരാട്ടം മൂർച്ഛിച്ചത്.
യുഎസ് നീക്കത്തിനെതിരെ മഡുറോ സൈന്യത്തെ പുനഃക്രമീകരിക്കുകയും ദശലക്ഷക്കണക്കിന് മിലിഷ്യകളെ സജ്ജമാക്കുകയും ചെയ്തു. മേഖലയിലെ യുഎസ് പ്രവർത്തനങ്ങളെ അദ്ദേഹം അപലപിക്കുകയും ചെയ്തു. വെനസ്വേലയിൽ ട്രംപ് നടത്തുന്ന സമ്മർദ്ദ തന്ത്രങ്ങളെ പ്രതിരോധിക്കാനുള്ള ശക്തമായ സൂചനയാണിത്.
ട്രംപിൻ്റെ ആദ്യ ഭരണകാലത്ത് 2019-ൽ വെനസ്വേലൻ പ്രതിപക്ഷ നേതാവായ ഹുവാൻ ഗുവൈഡോയെ രാജ്യത്തിൻ്റെ നിയമാനുസൃത പ്രസിഡൻ്റായി വൈറ്റ് ഹൗസ് അംഗീകരിച്ചിരുന്നു. മഡുറോയെ പുറത്താക്കുക എന്ന ലക്ഷ്യത്തോടെയാണ് യുഎസ് സമ്മർദ്ദ തന്ത്രങ്ങൾ ശക്തമാക്കുന്നതെന്ന് ട്രംപ് ഭരണകൂടത്തിലെ ഉദ്യോഗസ്ഥർ സമ്മതിക്കുന്നുണ്ട്.
ട്രംപ് ഭരണകൂടം ഈയിടെയായി മേഖലയിലേക്ക് യുദ്ധക്കപ്പലുകളും മറ്റ് ആയുധങ്ങളും നീക്കിയിരുന്നു. മയക്കുമരുന്ന് കടത്തുന്നു എന്ന് പറഞ്ഞ് വെനസ്വേലൻ തീരത്തിന് സമീപമുള്ള ബോട്ടുകളെ യുഎസ് ലക്ഷ്യമിടുകയും ചെയ്തിട്ടുണ്ട്. ബുധനാഴ്ച ട്രംപ് വെനസ്വേലയിൽ രഹസ്യ നടപടിക്ക് സിഐഎയ്ക്ക് അനുമതി നൽകിയിരുന്നു. കൂടാതെ, വെനസ്വേലൻ പ്രദേശത്ത് ആക്രമണം നടത്തുന്നത് യുഎസ് പരിഗണിക്കുകയാണെന്നും അദ്ദേഹം പറഞ്ഞു. “ഞങ്ങൾ തീർച്ചയായും കരഭാഗം ഇപ്പോൾ ശ്രദ്ധിക്കുന്നുണ്ട്, കാരണം കടൽ ഞങ്ങളുടെ നിയന്ത്രണത്തിലാണ്,” പ്രസിഡൻ്റ് ബുധനാഴ്ച മാധ്യമപ്രവർത്തകരോട് പറഞ്ഞു.
