വാഷിംഗ്ടൺ: യുഎസ് പ്രസിഡന്റ് ഡോണൾഡ് ട്രംപ്, കൊളംബിയൻ പ്രസിഡന്റ് ഗുസ്താവോ പെട്രോയുമായുള്ള തർക്കം കൂടുതൽ മൂർച്ഛിച്ച സാഹചര്യത്തിൽ, കൊളംബിയയ്ക്ക് നൽകിവരുന്ന എല്ലാ യുഎസ് ധനസഹായങ്ങളും സബ്സിഡികളും നിർത്തലാക്കിയതായി പ്രഖ്യാപിച്ചു. ഈ പ്രഖ്യാപനം ട്രംപ് ഒരു സോഷ്യൽ മീഡിയ പോസ്റ്റിലൂടെയാണ് നടത്തിയത്. കൊളംബിയയിലെ മയക്കുമരുന്ന് ഉൽപ്പാദനം തടയുന്നതിന് പെട്രോ യാതൊരു നടപടിയും സ്വീകരിക്കുന്നില്ലെന്ന് ട്രംപ് ആരോപിച്ചു. യുഎസ് നൽകുന്ന വൻതോതിലുള്ള ധനസഹായവും സബ്സിഡികളും അമേരിക്കയെ ദീർഘകാലമായി വഞ്ചിക്കാനുള്ള ഉപാധി മാത്രമാണെന്നും അദ്ദേഹം വിമർശിച്ചു.
“കൊളംബിയയ്ക്ക് ധനസഹായങ്ങളോ മറ്റേതെങ്കിലും തരത്തിലുള്ള പേയ്മെന്റുകളോ സബ്സിഡികളോ നൽകില്ല,” ട്രംപ് വ്യക്തമാക്കി. മയക്കുമരുന്ന് ഉൽപ്പാദന കേന്ദ്രങ്ങൾ അടച്ചുപൂട്ടാൻ പെട്രോ തയ്യാറാകണമെന്നും, അല്ലെങ്കിൽ യുണൈറ്റഡ് സ്റ്റേറ്റ്സ് അവ സ്വന്തം നിലയിൽ അടച്ചുപൂട്ടുമെന്നും, അത് മര്യാദപൂർവ്വം ആയിരിക്കില്ലെന്നും ട്രംപ് മുന്നറിയിപ്പ് നൽകി.
മയക്കുമരുന്ന് കടത്ത്, കുടിയേറ്റം തുടങ്ങിയ വിഷയങ്ങളിൽ ഇരു നേതാക്കളും തമ്മിൽ ഗുരുതരമായ അഭിപ്രായഭിന്നതകൾ നിലനിൽക്കുന്നുണ്ട്. ലോകത്തിലെ ഏറ്റവും വലിയ കൊക്കെയ്ൻ കയറ്റുമതി രാജ്യമായ കൊളംബിയയിൽ, കഴിഞ്ഞ വർഷം കൊക്ക കൃഷി സർവ്വകാല റെക്കോർഡിലെത്തിയിരുന്നു.
