വാഷിംഗ്ടണ്: പ്രസിഡന്റ് ഡോണൾഡ് ട്രംപ് ജനാധിപത്യത്തിന് നാശം വരുത്തി എന്ന കടുത്ത വിമര്ശനവുമായി മുൻ പ്രസിഡൻ്റ് ജോ ബൈഡൻ. നെബ്രാസ്ക ഡെമോക്രാറ്റിക് പാർട്ടി ഒമാഹയിൽ നടത്തിയ ഗാലയിൽ സംസാരിക്കുകയായിരുന്നു ബൈഡൻ. “ട്രംപ് രാജ്യത്തെ തകർക്കാൻ പോകുകയാണെന്ന് എനിക്കറിയാമായിരുന്നു, പക്ഷേ ഇതൊരു യഥാർത്ഥ നാശമായിരിക്കുമെന്ന് ഞാൻ കരുതിയില്ല, ഞാൻ സമ്മതിക്കുന്നു,” ബൈഡൻ പറഞ്ഞു. വൈറ്റ് ഹൗസിൻ്റെ ഈസ്റ്റ് വിംഗ് പൊളിച്ചുമാറ്റി 90,000 ചതുരശ്ര അടി വിസ്തീർണ്ണമുള്ള ബോൾറൂം നിർമ്മിക്കാൻ ട്രംപ് നടത്തിയ നടപടിയെ സൂചിപ്പിച്ചുകൊണ്ടായിരുന്നു ബൈഡൻ്റെ ഈ പരിഹാസം.
“അത് അദ്ദേഹത്തിൻ്റെ പ്രസിഡൻ്റ് സ്ഥാനത്തിൻ്റെ തികഞ്ഞ പ്രതീകമാണ്,” ബൈഡൻ പറഞ്ഞു. ട്രംപ് ജനങ്ങളുടെ ഭവനത്തിന് മാത്രമല്ല, ഭരണഘടനയ്ക്കും നിയമവാഴ്ചയ്ക്കും നമ്മുടെ ജനാധിപത്യത്തിന് പോലും നാശം വരുത്തിയിരിക്കുന്നുവെന്നും ബൈഡൻ കുട്ടിച്ചേര്ത്തു. തന്റെ രണ്ടാം ടേം രാജ്യത്തിന് ഒരു സുവർണ്ണ കാലഘട്ടം കൊണ്ടുവന്നുവെന്ന ട്രംപിന്റെ ആവർത്തിച്ചുള്ള പ്രഖ്യാപനങ്ങളെയും ബൈഡൻ പരിഹസിച്ചു.
നമ്മൾ ഒരു സുവർണ്ണ യുഗത്തിലാണ് എന്ന് അദ്ദേഹം ഇപ്പോൾ പറയുന്നു. ആ സ്വർണ്ണം അദ്ദേഹം ഷെൽഫിൽ തൂക്കിയിട്ടിരിക്കുന്ന വസ്തുക്കളാണ്. ഓവൽ ഓഫീസിലെ ട്രംപിൻ്റെ സ്വർണ്ണം പൂശിയ കൂട്ടിച്ചേർക്കലുകളെ സൂചിപ്പിച്ച് മുൻ പ്രസിഡൻ്റ് പറഞ്ഞു. പ്രസംഗത്തിനിടെ പലപ്പോഴും ബൈഡൻ ട്രംപിനെ നേരിട്ട് അഭിസംബോധന ചെയ്തു. “ഒരു രാജ്യമായി ഞങ്ങളെ നാണംകെടുത്തുന്ന രീതിയിലാണ് നിങ്ങൾ പ്രവർത്തിക്കുന്നത്,” ഒരു സന്ദർഭത്തിൽ മുൻ പ്രസിഡൻ്റ് ട്രംപിനോട് പറഞ്ഞു. കൂടാതെ, അമേരിക്കൻ ജനതയുടെ താൽപ്പര്യങ്ങളേക്കാൾ തൻ്റെ സമ്പന്നരായ സഖ്യകക്ഷികളുടെ താൽപ്പര്യങ്ങൾക്ക് ട്രംപ് മുൻഗണന നൽകുന്നതിനെയും ബൈഡൻ വിമർശിച്ചു.
