ന്യൂ ഓർലിയൻസ്: ട്രംപ് ഭരണകൂടത്തിന്‍റെ കുടിയേറ്റ നടപടികളുടെ മേൽനോട്ടം വഹിക്കുന്ന ഉന്നത ബോർഡർ പട്രോൾ ഉദ്യോഗസ്ഥനായ ഗ്രിഗറി ബോവിനോ ഡിസംബർ ആദ്യവാരം ന്യൂ ഓർലിയൻസിൽ എത്താൻ പദ്ധതിയിടുന്നതായി റിപ്പോർട്ട്. കുടിയേറ്റക്കാരെ അറസ്റ്റ് ചെയ്യുന്നതിൽ കടുത്തതും വിവാദപരവുമായ നിലപാടുകൾ സ്വീകരിച്ചതിലൂടെ ബോവിനോ ദേശീയ തലത്തിൽ ശ്രദ്ധ നേടിയിരുന്നു. ലോസ് ഏഞ്ചൽസ്, ചിക്കാഗോ, നോർത്ത് കരോലിനയിലെ ഷാർലറ്റ് എന്നിവിടങ്ങളിലെ നിയമനങ്ങൾക്ക് ശേഷം അദ്ദേഹം മുൻപ് ചീഫ് പട്രോൾ ഏജന്‍റായി സേവനമനുഷ്ഠിച്ച ന്യൂ ഓർലിയൻസിലേക്ക് ഡിസംബറിൽ എത്തുമെന്നാണ് പ്രതീക്ഷിക്കുന്നത്.
ബോവിനോയെ സഹായിക്കുന്നതിനായി മറ്റ് നഗരങ്ങളിലേക്ക് അയച്ച ഏജന്‍റുമാരുടെ എണ്ണത്തിന് ആനുപാതികമായി, ഏകദേശം 250 ഏജന്‍റുമാരെ ലൂസിയാനയിൽ വിന്യസിക്കാൻ ഡിപ്പാർട്ട്‌മെന്‍റ് ഓഫ് ഹോംലാൻഡ് സെക്യൂരിറ്റി (DHS) തീരുമാനിച്ചതായി വൃത്തങ്ങൾ കൂട്ടിച്ചേർത്തു.
“ഞങ്ങൾ ഒരു മികച്ച നേതൃത്വ ടീമിന് കീഴിലാണ് പ്രവർത്തിക്കുന്നത്. പ്രസിഡന്‍റ് ട്രംപ്, (ഹോംലാൻഡ് സെക്യൂരിറ്റി സെക്രട്ടറി) ക്രിസ്റ്റി നോയെം, മറ്റ് ഉദ്യോഗസ്ഥർ എന്നിവരെയെല്ലാം ഞങ്ങൾ നേതൃത്വത്തിനായി ആശ്രയിക്കുന്നു. അവർ പറയുന്ന കാര്യങ്ങളും ഞങ്ങളുടെ ഇന്‍റലിജൻസ് റിപ്പോർട്ടുകളും ഞങ്ങൾ ശ്രദ്ധിക്കുന്നു. അവ തമ്മിൽ സംയോജിപ്പിച്ചാണ് ഞങ്ങൾ ശക്തമായ നടപടികൾ സ്വീകരിക്കുന്നത്,” ഗ്രിഗറി ബോവിനോ പറഞ്ഞു. കുടിയേറ്റ നടപടികൾ ന്യൂ ഓർലിയൻസിലേക്ക് വ്യാപിപ്പിക്കുമെന്ന് പ്രസിഡന്‍റ് ട്രംപ് നേരത്തെ സൂചിപ്പിച്ചിരുന്നു. “ഞങ്ങൾ ഒരു തീരുമാനമെടുക്കുകയാണ്,” എന്നാണ് ഈ വർഷം നടന്ന ഒരു ഓവൽ ഓഫീസ് മീറ്റിംഗിൽ അദ്ദേഹം പറഞ്ഞത്.
