തിരുവനന്തപുരം: മുൻ എം.എൽ.എയും യൂത്ത് കോൺഗ്രസ് നേതാവുമായ കെ.എസ്. ശബരീനാഥനെ തിരുവനന്തപുരം കോർപ്പറേഷൻ തെരഞ്ഞെടുപ്പിൽ സ്ഥാനാർത്ഥിയാക്കാൻ കോൺഗ്രസിൽ ധാരണയായി. തലസ്ഥാന നഗരിയിലെ തദ്ദേശ സ്വയംഭരണ സ്ഥാപനത്തിലേക്ക് ഒരു പ്രമുഖ നേതാവിനെ തന്നെ കളത്തിലിറക്കി കോർപ്പറേഷനിലെ വിജയം ഉറപ്പിക്കാനാണ് കോൺഗ്രസിന്റെ ശ്രമം. പാർട്ടിക്ക് വ്യക്തമായ മേൽക്കൈയില്ലാത്ത കോർപ്പറേഷനിൽ ജനകീയ മുഖമുള്ള യുവനേതാവിനെ മത്സരിപ്പിക്കുന്നത് വഴി യുവവോട്ടർമാരെയും പൊതുജനങ്ങളെയും ആകർഷിക്കാനാകുമെന്നാണ് നേതൃത്വം വിലയിരുത്തുന്നത്. എ.ഐ.സി.സി.യുടെ നിർദ്ദേശത്തെ തുടർന്നാണ് ഈ നീക്കം.
ശബരീനാഥൻ തന്റെ വീട് സ്ഥിതി ചെയ്യുന്ന ശാസ്തമംഗലം വാർഡ് വനിതാ സംവരണമായതിനാൽ തൊട്ടടുത്തുള്ള കവടിയാർ വാർഡിൽ നിന്നാണ് മത്സരിക്കുക. തിരുവനന്തപുരം കോർപ്പറേഷന്റെ ചുമതലയുള്ള കെ. മുരളീധരൻ ഈ വിവരം സ്ഥിരീകരിച്ചിട്ടുണ്ട്. കോർപ്പറേഷനിൽ മികച്ച വിജയം നേടാൻ കെ.എസ്.യു, യൂത്ത് കോൺഗ്രസ് നേതാക്കൾ ഉൾപ്പെടെയുള്ളവരെ മത്സരരംഗത്തിറക്കുമെന്നും അദ്ദേഹം വ്യക്തമാക്കി. 2015-ലെ ഉപതിരഞ്ഞെടുപ്പിലൂടെ അരുവിക്കര എം.എൽ.എ.യായി രാഷ്ട്രീയത്തിൽ പ്രവേശിച്ച ശബരീനാഥൻ, കഴിഞ്ഞ നിയമസഭാ തിരഞ്ഞെടുപ്പിൽ പരാജയപ്പെട്ടിരുന്നു. പ്രധാനമായും ബി.ജെ.പിയുമായി ശക്തമായ ത്രികോണ മത്സരം നടക്കുന്ന തിരുവനന്തപുരം കോർപ്പറേഷനിൽ, യുവനേതാവിനെ അവതരിപ്പിക്കുന്നത് കോൺഗ്രസിന് വലിയ ഊർജ്ജം നൽകുമെന്നാണ് പ്രതീക്ഷ.
