ഹൈദരാബാദ് : ആന്ധ്രാപ്രദേശിലെ ശ്രീകാകുളം ജില്ലയിലുള്ള കാസിബുഗ്ഗയിലെ വെങ്കിടേശ്വര സ്വാമി ക്ഷേത്രത്തിൽ ഏകാദശി ആഘോഷങ്ങൾക്കിടെയുണ്ടായ തിക്കിലും തിരക്കിലും പെട്ട് മരിച്ചവരുടെ എണ്ണം 10 ആയി. മരിച്ചവരിൽ അധികവും സ്ത്രീകളും കുട്ടികളുമാണ്. നിരവധി പേർക്ക് പരിക്കേൽക്കുകയും ചെയ്തു.
പ്രധാനമന്ത്രി ദുഃഖം രേഖപ്പെടുത്തി; ധനസഹായം പ്രഖ്യാപിച്ചു
സംഭവത്തിൽ പ്രധാനമന്ത്രി നരേന്ദ്ര മോദി അഗാധമായ ദുഃഖം രേഖപ്പെടുത്തി. മരിച്ചവരുടെ കുടുംബാംഗങ്ങളെ അനുശോചനം അറിയിച്ച പ്രധാനമന്ത്രി, പരിക്കേറ്റവർ എത്രയും വേഗം സുഖം പ്രാപിക്കട്ടെയെന്നും സമൂഹമാധ്യമങ്ങളിൽ കുറിച്ചു. പ്രധാനമന്ത്രിയുടെ ഓഫീസ് അറിയിച്ചത് പ്രകാരം, മരിച്ചവരുടെ കുടുംബാംഗങ്ങൾക്ക് പ്രധാനമന്ത്രിയുടെ ദേശീയ ദുരിതാശ്വാസ നിധിയിൽ നിന്ന് രണ്ട് ലക്ഷം രൂപ വീതം സഹായധനം പ്രഖ്യാപിച്ചു. പരിക്കേറ്റവർക്ക് 50,000 രൂപ വീതവും നൽകും.
തിരക്കിന് കാരണം നിർമ്മാണത്തിലിരുന്ന ക്ഷേത്രവും അനുമതിയില്ലാത്ത കൂട്ടായ്മയും
‘മിനി തിരുപ്പതി’ എന്നും അറിയപ്പെടുന്ന ഈ വെങ്കിടേശ്വര സ്വാമി ക്ഷേത്രം സ്വകാര്യ ഉടമസ്ഥതയിലുള്ളതാണ്. കേവലം നാല് മാസം മുമ്പ് മാത്രം ഉദ്ഘാടനം ചെയ്ത ക്ഷേത്രത്തിന് വലിയ രീതിയിലുള്ള ഭക്തജനക്കൂട്ടായ്മ സംഘടിപ്പിക്കാൻ അധികാരികളിൽ നിന്ന് മുൻകൂർ അനുമതി ലഭിച്ചിരുന്നില്ലെന്നാണ് മാധ്യമ റിപ്പോർട്ടുകൾ സൂചിപ്പിക്കുന്നത്. കൂടാതെ, ഭക്തർ തടിച്ചുകൂടിയ ക്ഷേത്രത്തിന്റെ ഒരു ഭാഗം നിർമ്മാണത്തിലിരിക്കുകയായിരുന്നു എന്നും ഒരു പ്രവേശന കവാടവും ഒരു എക്സിറ്റ് പോയിന്റും മാത്രമാണ് ഇവിടെ ഉണ്ടായിരുന്നതെന്നും സർക്കാർ ഉദ്യോഗസ്ഥർ വ്യക്തമാക്കി. തിക്കും തിരക്കുമുണ്ടായപ്പോൾ ജനക്കൂട്ടത്തിന്റെ സമ്മർദ്ദം താങ്ങാനാവാതെ സ്റ്റീൽ കൈവരികൾ തകർന്നു വീണതാണ് ദുരന്തത്തിന്റെ ആക്കം കൂട്ടിയത്. അപകടസ്ഥലത്ത് ആളുകൾ പരിഭ്രാന്തരായി ഓടുന്നതിന്റെയും, പരിക്കേറ്റവരെ സഹായിക്കാൻ രക്ഷാപ്രവർത്തകർ തിടുക്കം കൂട്ടുന്നതിന്റെയും ദൃശ്യങ്ങൾ പുറത്തുവന്നിട്ടുണ്ട്.
