ജറുസലേം: യുഎസ് പ്രസിഡന്റ് ഡോണൾഡ് ട്രംപ് ഗാസയിൽ വെടിനിർത്തൽ പ്രഖ്യാപിച്ചിട്ട് ഒരു മാസത്തിലധികം കഴിഞ്ഞിട്ടും, അദ്ദേഹത്തിൻ്റെ സമാധാന പദ്ധതിയിലെ ഒരു പ്രധാന ഘടകം ഇതുവരെ നടപ്പിലായില്ല. തകർന്ന ഗാസയിലെ സ്ഥിരത ഉറപ്പാക്കാൻ ഒരു ബഹുരാഷ്ട്ര സേനയെ വിന്യസിക്കണമെന്ന് 20 ഇന പദ്ധതിയിൽ വ്യക്താക്കിയിരുന്നു. എന്നാൽ, അതിൽ പങ്കാളികളാകാൻ സാധ്യതയുള്ള രാജ്യങ്ങൾ പറയുന്നത്, സേനയുടെ പ്രവർത്തന പരിധിയെക്കുറിച്ചുള്ള നിർണായക വിവരങ്ങൾ ഇപ്പോഴും അന്തിമരൂപത്തിലായിട്ടില്ലെന്നാണ്.
സെപ്റ്റംബർ 29-നാണ് ഗാസയിലെ യുദ്ധം അവസാനിപ്പിക്കാനുള്ള തൻ്റെ പദ്ധതി ട്രംപ് പ്രഖ്യാപിച്ചത്. അന്താരാഷ്ട്ര സ്ഥിരതാ സേന ഉടനടി വിന്യസിക്കുമെന്നാണ് അദ്ദേഹം പറഞ്ഞത്. പലസ്തീൻ പോലീസിന് പരിശീലനം നൽകുക, ഇസ്രായേലുമായും ഈജിപ്തുമായുള്ള അതിർത്തികൾ സുരക്ഷിതമാക്കുക, ആയുധങ്ങളുടെ ഒഴുക്ക് തടയുക, ഇസ്രായേൽ സൈന്യത്തെ ഗാസയിൽ നിന്ന് പിൻവലിക്കുന്നത് സാധ്യമാക്കുക എന്നിവയായിരുന്നു ഐഎസ്എഫിൻ്റെ ലക്ഷ്യങ്ങൾ.
വെടിനിർത്തൽ കരാറിൻ്റെ ഒന്നാം ഘട്ടത്തിൽ ഗാസയിൽ ബന്ദികളാക്കപ്പെട്ടവരെ മോചിപ്പിക്കുക, ഇസ്രായേലിൽ തടവിലുള്ള പലസ്തീൻ തടവുകാരെയും ബന്ദികളെയും വിട്ടയക്കുക എന്നിവ ഉൾപ്പെടുന്നു. ട്രംപിൻ്റെ പദ്ധതിയുടെ രണ്ടാം ഘട്ടത്തിന് ഐഎസ്എഫിൻ്റെ രൂപീകരണം ആവശ്യമാണ്. യുഎസ് ഉദ്യോഗസ്ഥർ നിരവധി രാജ്യങ്ങളുടെ പേരുകൾ സാധ്യതയുള്ള പങ്കാളികളായി നിർദ്ദേശിക്കുകയും ചില രാജ്യങ്ങൾ താൽപ്പര്യം പ്രകടിപ്പിക്കുകയും ചെയ്തിട്ടുണ്ടെങ്കിലും, ഒന്നുംതന്നെ ഔദ്യോഗികമായി തങ്ങളുടെ പങ്കാളിത്തം പ്രഖ്യാപിച്ചിട്ടില്ല.
