ഇന്ത്യൻ സൈന്യത്തിന് വേണ്ടി ഓർഡർ ചെയ്ത ആറ് അത്യാധുനിക എ.എച്ച്-64ഇ (AH-64E) അപ്പാച്ചെ അറ്റാക്ക് ഹെലികോപ്റ്ററുകൾ കൂടി ലഭിച്ചതോടെ ഇന്ത്യയുടെ അപ്പാച്ചെ ഹെലികോപ്റ്റർ സേന പൂർണമായി. ഇതോടെ അമേരിക്കൻ കമ്പനിയായ ബോയിംഗിൽ (Boeing) നിന്ന് ഇന്ത്യയ്ക്ക് ലഭിക്കാനുള്ള എല്ലാ അപ്പാച്ചെ ഹെലികോപ്റ്ററുകളുടെയും വിതരണം പൂർത്തിയായി. നേരത്തെ, ഇന്ത്യൻ വ്യോമസേനയ്ക്കായി (ഐ.എ.എഫ്.) 22 അപ്പാച്ചെ ഹെലികോപ്റ്ററുകൾ ഇന്ത്യ വാങ്ങിയിരുന്നു.
ഇന്ത്യൻ സൈന്യത്തിന് വേണ്ടി ലഭിച്ച ആറ് അപ്പാച്ചെ ഹെലികോപ്റ്ററുകൾ അരുണാചൽ പ്രദേശിലെ മിസമാരി എയർബേസിലാണ് വിന്യസിച്ചിരിക്കുന്നത്. ഈ ഹെലികോപ്റ്ററുകൾ കിഴക്കൻ മേഖലയിലെ സൈനിക നടപടികളിൽ നിർണായക പങ്കുവഹിക്കാൻ ശേഷിയുള്ളവയാണ്. ഭീഷണി നേരിടുന്ന ഏത് സാഹചര്യത്തിലും സൈനികർക്ക് കൃത്യമായ പിന്തുണ നൽകാനും ശത്രുവിനെതിരെ ആക്രമണം നടത്താനും ഈ ഹെലികോപ്റ്ററുകൾക്ക് കഴിയും.
ലോകോത്തര നിലവാരമുള്ളതും ആക്രമണശേഷിയിൽ മുൻപന്തിയിലുള്ളതുമാണ് അപ്പാച്ചെ ഹെലികോപ്റ്ററുകൾ. ഇവയുടെ വരവ് ഇന്ത്യൻ സൈന്യത്തിന്റെ വ്യോമ പ്രതിരോധശേഷി വർദ്ധിപ്പിക്കുകയും, അതിർത്തി സുരക്ഷയ്ക്ക് കൂടുതൽ കരുത്തുപകരുകയും ചെയ്യും. ഇവയുടെ വിന്യാസം കിഴക്കൻ അതിർത്തിയിലെ സൈനിക സന്നാഹം ശക്തിപ്പെടുത്തുന്നതിൽ നിർണായക പങ്ക് വഹിക്കുമെന്നാണ് വിലയിരുത്തൽ.
