വാഷിംഗ്ടൺ: പ്രസിഡന്റ് ട്രംപുമായി പരസ്യമായി ഇടഞ്ഞ് വാർത്തകളിൽ നിറഞ്ഞ ജോർജിയ പ്രതിനിധി മാർജോറി ടെയ്ലർ ഗ്രീൻ, കോൺഗ്രസിൽ നിന്ന് വിരമിക്കാൻ തീരുമാനിച്ചതിന് പിന്നാലെ തന്റെ വിവാഹനിശ്ചയ വാർത്ത പുറത്തുവിട്ടു. തീവ്ര വലതുപക്ഷ മാധ്യമ ശൃംഖലയായ റിയൽ അമേരിക്കാസ് വോയ്സിന്റെ പ്രമുഖ ട്രംപ് അനുകൂലിയും പണ്ഡിറ്റുമായ ബ്രയാൻ ഗ്ലെൻ ആണ് വരൻ. തിങ്കളാഴ്ച തന്റെ എക്സ് അക്കൗണ്ടിലാണ് ഗ്രീൻ ഈ ആനന്ദവാർത്ത പങ്കുവെച്ചത്. “Happily ever after!!!” എന്ന കുറിപ്പിനൊപ്പം ചിത്രം പോസ്റ്റ് ചെയ്ത ഗ്രീൻ, വിവാഹനിശ്ചയ മോതിരം പ്രദർശിപ്പിക്കുന്ന ഫോട്ടോയും പങ്കുവെച്ചു.
റിയൽ അമേരിക്കാസ് വോയ്സിന്റെ ചീഫ് വൈറ്റ് ഹൗസ് കറസ്പോണ്ടന്റായ ബ്രയാൻ ഗ്ലെനും ഇതേ ചിത്രം സോഷ്യൽ മീഡിയയിൽ പോസ്റ്റ് ചെയ്തിട്ടുണ്ട്. കഴിഞ്ഞ മാസം അടുത്ത ജനുവരിയിൽ കോൺഗ്രസ് സീറ്റ് ഒഴിയുമെന്ന് ഗ്രീൻ പ്രഖ്യാപിച്ചിരുന്നു. മുമ്പ് ഡോണൾഡ് ട്രംപിന്റെ ഏറ്റവും വലിയ ആരാധികയായിരുന്ന ഗ്രീൻ ഇപ്പോൾ അദ്ദേഹവുമായി തുറന്ന വാഗ്വാദത്തിലാണ്. ഗ്രീനിനെ രാജ്യദ്രോഹി എന്ന് വിളിച്ച ട്രംപ്, അവർക്കെതിരെ മറ്റൊരു റിപ്പബ്ലിക്കൻ സ്ഥാനാർത്ഥിയെ പിന്തുണയ്ക്കുമെന്നും പ്രഖ്യാപിച്ചു.
ട്രംപിന്റെ രണ്ടാം ടേമിൽ ആഭ്യന്തര കാര്യങ്ങളെക്കാൾ വിദേശനയങ്ങൾക്കാണ് പ്രാധാന്യം നൽകുന്നതെന്ന് ഗ്രീൻ ആരോപിക്കുന്നു. ജെഫ്രി എപ്സ്റ്റീൻ കേസിലെ ഫയലുകൾ പുറത്തുവിടുന്നതിൽ ജസ്റ്റിസ് ഡിപ്പാർട്ട്മെന്റിന്റെ കൈകാര്യം ചെയ്യലിൽ വീഴ്ചയുണ്ടായെന്നും അവർ കുറ്റപ്പെടുത്തി. 2021ൽ കാപ്പിറ്റോൾ ഹില്ലിലെത്തിയ ഗ്രീൻ തീവ്ര നിലപാടുകളും ട്രംപിനോടുള്ള അടിയുറച്ച പിന്തുണയും കൊണ്ടാണ് ശ്രദ്ധ നേടിയത്.
