പ്രിട്ടോറിയ: ദക്ഷിണാഫ്രിക്കയിലെ ആഫ്രിക്കാനർമാരെ (വെള്ളക്കാർ) അമേരിക്കയിലേക്ക് അഭയാർത്ഥികളായി എത്തിക്കാനുള്ള ട്രംപ് ഭരണകൂടത്തിന്റെ ശ്രമങ്ങൾക്കിടെ, രണ്ട് യുഎസ് സർക്കാർ ഉദ്യോഗസ്ഥരെ ദക്ഷിണാഫ്രിക്കൻ അധികൃതർ താത്കാലികമായി തടഞ്ഞുവെച്ചു. ചോദ്യം ചെയ്യലിന് ശേഷം ഇവരെ വിട്ടയച്ചെങ്കിലും, ഇരു രാജ്യങ്ങളും തമ്മിലുള്ള നയതന്ത്ര ബന്ധം ഇതോടെ കൂടുതൽ വഷളായിരിക്കുകയാണ്. ദക്ഷിണാഫ്രിക്കയിലെ വെളുത്ത വംശജരെ അഭയാർത്ഥികളായി സ്വീകരിക്കാനുള്ള അമേരിക്കൻ നടപടിയെ ദക്ഷിണാഫ്രിക്കൻ സർക്കാർ മുമ്പുതന്നെ ശക്തമായി എതിർത്തിരുന്നു.
അഭയാർത്ഥി അപേക്ഷകൾ പ്രോസസ് ചെയ്യുന്ന കേന്ദ്രത്തിലെ പരിശോധനയ്ക്കിടെയാണ് അമേരിക്കൻ ഉദ്യോഗസ്ഥർ തടഞ്ഞുവെക്കപ്പെട്ടത്. അവിടെ പ്രവർത്തിച്ചിരുന്ന കെനിയൻ പൗരന്മാരുടെ ഇമിഗ്രേഷൻ രേഖകളിലെ നിയമലംഘനങ്ങൾ അന്വേഷിക്കാനാണ് തങ്ങൾ എത്തിയതെന്ന് ദക്ഷിണാഫ്രിക്കൻ ആഭ്യന്തര മന്ത്രാലയം സിഎൻഎന്നിന് നൽകിയ പ്രസ്താവനയിൽ പറഞ്ഞു. രേഖകളില്ലാതെ തൊഴിൽ ചെയ്യുന്നവരുമായി വിദേശ ഉദ്യോഗസ്ഥർ സഹകരിക്കുന്നത് നയതന്ത്ര നിയമങ്ങളുടെ ലംഘനമാണെന്നും ഇത് അവരുടെ ഉദ്ദേശ്യത്തെക്കുറിച്ച് ഗുരുതര ചോദ്യങ്ങൾ ഉയർത്തുന്നുവെന്നും ദക്ഷിണാഫ്രിക്കൻ അധികൃതർ ആരോപിച്ചു.
ട്രംപ് ഭരണകൂടം ആഫ്രിക്കാനർ വിഭാഗത്തിന് നൽകുന്ന പ്രത്യേക പരിഗണനയും അവരെ അമേരിക്കയിലേക്ക് അഭയാർത്ഥികളായി എത്തിക്കാനുള്ള നീക്കങ്ങളും ദക്ഷിണാഫ്രിക്കയെ പ്രകോപിപ്പിച്ചിരിക്കുകയാണ്. സ്വന്തം ആഭ്യന്തരകാര്യങ്ങളിൽ അമേരിക്ക അനാവശ്യമായി ഇടപെടുന്നുവെന്നാണ് ദക്ഷിണാഫ്രിക്കൻ സർക്കാരിന്റെ നിലപാട്. ഈ സംഭവത്തോടെ ദക്ഷിണാഫ്രിക്കയിൽ പ്രവർത്തിക്കുന്ന അമേരിക്കൻ ഉദ്യോഗസ്ഥർ നേരിടുന്ന ബുദ്ധിമുട്ടുകൾ കൂടുതലായിരിക്കുകയാണ്. അടുത്ത ദിവസങ്ങളിൽ ഈ വിഷയത്തിൽ വാഷിംഗ്ടണിന്റെ ഔദ്യോഗിക നിലപാട് എന്തായിരിക്കുമെന്നാണ് നയതന്ത്ര ലോകം ശ്രദ്ധിക്കുന്നത്.
