വാഷിംഗ്ടൺ: യുഎസ് സർക്കാർ കഴിഞ്ഞ ജനുവരി 29-ന് പൊട്ടോമാക് നദിക്ക് മുകളിൽ സംഭവിച്ച വിമാന കൂട്ടിയിടിയിൽ ഗുരുതരമായ പിഴവുകൾ ഉണ്ടായിരുന്നുവെന്ന് സമ്മതിച്ചു. യുഎസ് ആർമിയുടെ ബ്ലാക്ക് ഹോക്ക് ഹെലികോപ്റ്ററിലെ പൈലറ്റുമാരുടെയും റീഗൻ നാഷണൽ എയർപോർട്ടിലെ എയർ ട്രാഫിക് കൺട്രോളറുടെയും തെറ്റുകളാണ് ഈ ദുരന്തത്തിന് ഇടയാക്കിയതെന്ന് ജസ്റ്റിസ് ഡിപ്പാർട്ട്മെന്റ് ബുധനാഴ്ച കോടതിയിൽ സമർപ്പിച്ച രേഖകളിൽ വ്യക്തമാക്കി. ഈ കൂട്ടിയിടിയിൽ 67 പേരാണ് മരിച്ചത്.
അമേരിക്കൻ ഈഗിൾ ഫ്ലൈറ്റിലെ ഒരു യാത്രക്കാരന്റെ കുടുംബം ഫയൽ ചെയ്ത സിവിൽ നഷ്ടപരിഹാര കേസിനോടുള്ള പ്രതികരണമായാണ് സർക്കാരിന്റെ ഈ പ്രധാന വെളിപ്പെടുത്തൽ. 209 പേജുള്ള കോടതി ഫയലിങ്ങിൽ സർക്കാർ തങ്ങളുടെ ഉത്തരവാദിത്തത്തിൽ വീഴ്ച സംഭവിച്ചുവെന്ന് സ്ഥിരീകരിക്കുന്നു. ഇത് മരിച്ചവരുടെ കുടുംബങ്ങൾക്ക് നഷ്ടപരിഹാരം തേടുന്നതിന് നിയമപരമായ പിന്തുണ നൽകും. നാഷണൽ ട്രാൻസ്പോർട്ടേഷൻ സേഫ്റ്റി ബോർഡ് (എൻടിഎസ്ബി) അപകടത്തെക്കുറിച്ച് സ്വതന്ത്ര അന്വേഷണം നടത്തിക്കൊണ്ടിരിക്കെ, സൈന്യത്തിന്റെ ഈ ഏറ്റുപറച്ചിൽ അപ്രതീക്ഷിതമായി.
റീഗൻ എയർപോർട്ടിൽ ലാൻഡിങ്ങിനായി സമീപിക്കുകയായിരുന്ന അമേരിക്കൻ ഈഗിൾ വിമാനത്തിൽ നിന്ന് സുരക്ഷിത അകലം പാലിച്ച് പറക്കുമെന്ന് സൈനിക ഹെലികോപ്റ്റർ ക്രൂ എയർ ട്രാഫിക് കൺട്രോൾ ടവറിനോട് അറിയിച്ചിരുന്നു. എന്നാൽ വിമാനത്തെ ശരിയായി നിരീക്ഷിക്കുന്നതിലും സുരക്ഷിതമായ ദൂരം നിലനിർത്തുന്നതിലും പൈലറ്റുമാർ പരാജയപ്പെട്ടുവെന്ന് സർക്കാർ ഇപ്പോൾ അംഗീകരിക്കുന്നു. അതോടൊപ്പം, ടവറിലെ കൺട്രോളർ ഫെഡറൽ ഏവിയേഷൻ അഡ്മിനിസ്ട്രേഷന്റെ സുരക്ഷാ മാർഗനിർദേശങ്ങൾ പാലിക്കാതിരുന്നതായും രേഖകളിൽ ചൂണ്ടിക്കാട്ടുന്നു.
