തിരുവനന്തപുരം : കേരള രാഷ്ട്രീയത്തിൽ ഏറെ ചർച്ച ചെയ്യപ്പെട്ട തൊണ്ടിമുതൽ കേസിൽ മുൻ മന്ത്രിയും എം.എൽ.എയുമായ ആന്റണി രാജുവിനെതിരായ വിധി ഇന്ന് പ്രസ്താവിക്കും. തിരുവനന്തപുരം സിജെഎം കോടതിയാണ് കേസിൽ വിധി പറയുന്നത്. വിദേശ പൗരൻ പ്രതിയായ മയക്കുമരുന്ന് കേസിലെ തൊണ്ടിമുതലായ അടിവസ്ത്രത്തിൽ മാറ്റം വരുത്തി പ്രതിയെ രക്ഷപ്പെടാൻ സഹായിച്ചു എന്നതാണ് ആന്റണി രാജുവിനെതിരെയുള്ള കുറ്റം. മൂന്ന് പതിറ്റാണ്ടിലേറെ പഴക്കമുള്ള ഈ കേസിൽ കോടതിയുടെ തീരുമാനം ആന്റണി രാജുവിന്റെ രാഷ്ട്രീയ ഭാവിയിൽ നിർണ്ണായകമാകും.
1990-ലാണ് കേസിനാസ്പദമായ സംഭവം നടന്നത്. ലഹരിമരുന്ന് കേസിലെ പ്രതിയായിരുന്ന ആൻഡ്രൂ സാൽവത്തോർ സർവലി എന്ന വിദേശിയെ രക്ഷിക്കാൻ വേണ്ടി, കോടതിയുടെ കസ്റ്റഡിയിലിരുന്ന തൊണ്ടിമുതലിൽ ആന്റണി രാജു കൃത്രിമം കാണിച്ചുവെന്നാണ് ആരോപണം. അടിവസ്ത്രം പ്രതിക്ക് പാകമാകാത്ത വിധം വെട്ടിത്തയ്ച്ച് കോടതിയിൽ ഹാജരാക്കി എന്നാണ് പ്രോസിക്യൂഷൻ വാദം. ഇതുവഴി വിദേശിക്ക് ഹൈക്കോടതിയിൽ നിന്ന് ജാമ്യം ലഭിക്കാൻ സാഹചര്യം ഒരുങ്ങിയെന്നും അന്വേഷണ സംഘം കണ്ടെത്തിയിരുന്നു. വിചാരണ വൈകുന്നുവെന്ന പരാതികൾക്കിടയിലാണ് ഇപ്പോൾ വിധി വരുന്നത്.
കേസ് റദ്ദാക്കണമെന്ന് ആവശ്യപ്പെട്ട് ആന്റണി രാജു സുപ്രീം കോടതിയെ സമീപിച്ചിരുന്നെങ്കിലും, വിചാരണ നേരിടാനായിരുന്നു കോടതി നിർദ്ദേശം. സാങ്കേതിക കാരണങ്ങൾ ചൂണ്ടിക്കാട്ടി ഹൈക്കോടതി നേരത്തെ കുറ്റപത്രം റദ്ദാക്കിയിരുന്നുവെങ്കിലും, സുപ്രീം കോടതി ഇടപെടലിലൂടെ വിചാരണ നടപടികൾ പുനരാരംഭിക്കുകയായിരുന്നു. സംസ്ഥാന സർക്കാരും കേസിൽ നിർണ്ണായക നിലപാടാണ് സ്വീകരിച്ചിരിക്കുന്നത്. കുറ്റം തെളിയിക്കപ്പെട്ടാൽ എം.എൽ.എ സ്ഥാനത്തിന് ഉൾപ്പെടെ തിരിച്ചടിയുണ്ടാകാൻ സാധ്യതയുള്ളതിനാൽ രാഷ്ട്രീയ കേരളം ഉറ്റുനോക്കുന്ന വിധിയാണിത്.
