വാഷിംഗ്ടൺ: അമേരിക്കയിലെ ഇമിഗ്രേഷൻ നിയമങ്ങൾ നടപ്പിലാക്കുന്നതിനെ ചൊല്ലിയുള്ള തർക്കങ്ങൾക്കിടെ, സംസ്ഥാനങ്ങളിലെ സുപ്രധാന വോട്ടർ വിവരങ്ങൾ കൈമാറണമെന്ന ആവശ്യവുമായി അറ്റോർണി ജനറൽ പാം ബോണ്ടി രംഗത്തെത്തിയത് പുതിയ രാഷ്ട്രീയ പോരിന് വഴിതുറക്കുന്നു. മിനസോട്ടയിലെ സെൻസിറ്റീവ് വോട്ടർ രജിസ്ട്രേഷൻ രേഖകൾ ഫെഡറൽ ഗവൺമെന്റിന് കൈമാറണമെന്ന ബോണ്ടിയുടെ ആവശ്യം, രാജ്യവ്യാപകമായി ട്രംപ് ഭരണകൂടം നടത്തുന്ന വിവരശേഖരണത്തിന്റെ ഭാഗമായാണ് വിലയിരുത്തപ്പെടുന്നത്.
വോട്ടർ പട്ടികയിലെ വിവരങ്ങൾ ആവശ്യപ്പെട്ട് മിനസോട്ട ഉൾപ്പെടെ 24 സംസ്ഥാനങ്ങൾക്കെതിരെ നീതിന്യായ വകുപ്പ് ഇതിനകം തന്നെ നിയമനടപടി ആരംഭിച്ചിട്ടുണ്ട്. ഇതിനിടെ, “അരാജകത്വം അവസാനിപ്പിക്കാൻ” വോട്ടർ രേഖകൾ വിട്ടുനൽകണമെന്ന് ആവശ്യപ്പെട്ട് ശനിയാഴ്ച മിനസോട്ട ഗവർണർ ടിം വാൾസിന് പാം ബോണ്ടി കത്തയച്ചു. വോട്ടർ പട്ടികയിൽ നിന്ന് അനർഹരെ ഒഴിവാക്കാൻ സംസ്ഥാനങ്ങളെ സഹായിക്കാനാണ് ഈ നീക്കമെന്നാണ് ഭരണകൂടത്തിന്റെ ഔദ്യോഗിക വിശദീകരണം. എന്നാൽ, ഈ ഡാറ്റാ ശേഖരണത്തിന് പിന്നിൽ മറ്റ് ലക്ഷ്യങ്ങളുണ്ടെന്ന സംശയത്തിലാണ് വോട്ടർ അവകാശ പ്രവർത്തകരും മുൻ നീതിന്യായ വകുപ്പ് ഉദ്യോഗസ്ഥരും.
ഈ വിഷയത്തിൽ കോടതിയുടെ നിരീക്ഷണവും ഭരണകൂടത്തിന് തിരിച്ചടിയായിരിക്കുകയാണ്. “കോടതിയിലൂടെ നേടാൻ കഴിയാത്ത കാര്യങ്ങൾ ബലപ്രയോഗത്തിലൂടെ നേടിയെടുക്കാനാണോ എക്സിക്യൂട്ടീവ് ശ്രമിക്കുന്നത്?” എന്ന് ഡിസ്ട്രിക്റ്റ് ജഡ്ജി കേറ്റ് മെനൻഡസ് തിങ്കളാഴ്ച നടന്ന വാദത്തിനിടെ നേരിട്ട് ചോദിച്ചു. എന്നാൽ ഫെഡറൽ നിയമങ്ങൾ നടപ്പിലാക്കാൻ മാത്രമാണ് തങ്ങൾ ശ്രമിക്കുന്നതെന്നാണ് നീതിന്യായ വകുപ്പിന്റെ അഭിഭാഷകൻ കോടതിയിൽ മറുപടി നൽകിയത്.
മിനസോട്ടയിലെ വോട്ടർമാരുടെ സ്വകാര്യത ലംഘിക്കാൻ കഴിയില്ലെന്ന് വ്യക്തമാക്കി സ്റ്റേറ്റ് സെക്രട്ടറി സ്റ്റീവ് സൈമൺ വിവരങ്ങൾ കൈമാറാൻ വിസമ്മതിച്ചു. ഫെഡറൽ, സ്റ്റേറ്റ് സ്വകാര്യതാ നിയമങ്ങളുടെ ലംഘനമാണിതെന്ന് അദ്ദേഹം ചൂണ്ടിക്കാട്ടി. അറ്റോർണി ജനറലിന്റെ കത്ത് തികച്ചും അസ്വസ്ഥതയുണ്ടാക്കുന്നതാണെന്ന് അദ്ദേഹം മാധ്യമങ്ങളോട് പ്രതികരിച്ചു. മറ്റ് പല സംസ്ഥാനങ്ങളും ഇതേ നിലപാടിൽ ഉറച്ചുനിൽക്കുന്നതോടെ ഭരണകൂടവും സംസ്ഥാനങ്ങളും തമ്മിലുള്ള നിയമപോരാട്ടം വരും ദിവസങ്ങളിൽ കൂടുതൽ ശക്തമാകും.
