ദാവോസ്: അമേരിക്കൻ പ്രസിഡന്റ് ഡോണൾഡ് ട്രംപിന്റെ ഗ്രീൻലാൻഡ് സംബന്ധിച്ച ഭീഷണികൾക്കെതിരെ യൂറോപ്യൻ യൂണിയൻ ശക്തമായ നിലപാട് സ്വീകരിച്ചു. കഴിഞ്ഞ ജൂലൈയിൽ ഒപ്പുവെച്ച പ്രധാന യുഎസ്-ഇയു വ്യാപാര കരാറിന്റെ അംഗീകാരം യൂറോപ്യൻ പാർലമെന്റ് താൽക്കാലികമായി മരവിപ്പിച്ചു. ബുധനാഴ്ച നടന്ന പാർലമെന്റിന്റെ വ്യാപാര സമിതി യോഗത്തിലാണ് ഈ തീരുമാനമെടുത്തത്. ഇതോടെ ട്രംപിന്റെ ‘അമേരിക്ക ഫസ്റ്റ്’ നയവും ഗ്രീൻലാൻഡ് സംബന്ധിച്ച ആഗ്രഹവും ട്രാൻസ്-അറ്റ്ലാന്റിക് ബന്ധങ്ങളെ ഗുരുതരമായ പ്രതിസന്ധിയിലാക്കിയിരിക്കുകയാണ്.
യുഎസ് വ്യാവസായിക ഉൽപ്പന്നങ്ങളുടെ ഇറക്കുമതി തീരുവ ഒഴിവാക്കുന്നതുമായി ബന്ധപ്പെട്ട വോട്ടെടുപ്പാണ് യൂറോപ്യൻ പാർലമെന്റ് അനിശ്ചിതകാലത്തേക്ക് മാറ്റിവെച്ചത്. ഗ്രീൻലാൻഡ് കൈമാറാത്ത പക്ഷം യൂറോപ്യൻ രാജ്യങ്ങൾക്ക് മേൽ അധിക തീരുവകൾ ഏർപ്പെടുത്തുമെന്ന ട്രംപിന്റെ ഭീഷണിയാണ് ഈ നടപടിക്ക് കാരണമായത്. ഒരു അംഗരാജ്യമായ ഡെന്മാർക്കിന്റെ പരമാധികാരത്തെ ഭീഷണിപ്പെടുത്തുന്നതും വ്യാപാര തീരുവകളെ ഭീഷണി ഉപാധിയായി ഉപയോഗിക്കുന്നതും അംഗീകരിക്കാനാവില്ലെന്ന് പാർലമെന്റ് വ്യാപാര സമിതി ചെയർമാൻ ബെർണ്ട് ലാങ് വ്യക്തമാക്കി.
അമേരിക്ക സഹകരണത്തിന്റെ പാതയിലേക്ക് മടങ്ങിവരുന്നത് വരെ കരാറുമായി മുന്നോട്ടുപോകില്ലെന്നും അദ്ദേഹം പറഞ്ഞു. 93 ബില്യൺ യൂറോ (ഏകദേശം 108 ബില്യൺ ഡോളർ) വരുന്ന തിരിച്ചടി നടപടികളാണ് അമേരിക്കൻ ഉൽപ്പന്നങ്ങൾക്കെതിരെ യൂറോപ്യൻ യൂണിയൻ ലക്ഷ്യമിടുന്നത്. ഇത് ആഗോള വിപണികളിൽ വലിയ ഇടിവുണ്ടാക്കിയിട്ടുണ്ട്. ആപ്പിൾ, നെറ്റ്ഫ്ലിക്സ് തുടങ്ങിയ അമേരിക്കൻ കമ്പനികളുടെ യൂറോപ്പിലെ പ്രവർത്തനങ്ങളെയും ഇത് ബാധിച്ചേക്കാം.
