ടെഹ്റാൻ: ഇറാനിൽ രണ്ടാഴ്ചയിലേറെയായി തുടരുന്ന ആഭ്യന്തര കലാപത്തിൽ ആയിരക്കണക്കിന് ഇറാനികൾ കൊല്ലപ്പെട്ടതായി പരമോന്നത നേതാവ് ആയത്തുള്ള അലി ഖമേനി സ്ഥിരീകരിച്ചു. എന്നാൽ ഈ മരണങ്ങളുടെ പൂർണ്ണ ഉത്തരവാദിത്തം അമേരിക്കൻ പ്രസിഡന്റ് ഡോണൾഡ് ട്രംപിനാണെന്ന് അദ്ദേഹം ആരോപിച്ചു. പ്രതിഷേധക്കാർക്ക് സൈനിക പിന്തുണ വാഗ്ദാനം ചെയ്തുകൊണ്ട് ട്രംപ് കലാപകാരികളെ ‘പരസ്യമായി പ്രോത്സാഹിപ്പിച്ചു’ എന്നാണ് ഖമേനിയുടെ വാദം. അമേരിക്ക കേന്ദ്രീകരിച്ച് പ്രവർത്തിക്കുന്ന മനുഷ്യാവകാശ സംഘടനയായ HRANA-യുടെ കണക്കനുസരിച്ച് ഏകദേശം 3,000-ത്തിലധികം ആളുകൾ കലാപത്തിൽ കൊല്ലപ്പെട്ടിട്ടുണ്ട്. എന്നാൽ ഇറാനിലെ സുരക്ഷാ സേനയുടെ നടപടികളെക്കുറിച്ച് ഖമേനി തന്റെ പ്രസംഗത്തിൽ പരാമർശിച്ചില്ല.
ഡോണൾഡ് ട്രംപ് ഒരു ‘കുറ്റവാളി’ ആണെന്നും ഇറാനിലെ നാശനഷ്ടങ്ങൾക്കും മരണങ്ങൾക്കും അദ്ദേഹം ഉത്തരവാദിയാണെന്നും ഖമേനി പറഞ്ഞു. കലാപകാരികളെ രണ്ട് വിഭാഗങ്ങളായി ഖമേനി തരംതിരിച്ചു. ഒന്ന്, അമേരിക്കയും ഇസ്രായേലും നേരിട്ട് ഫണ്ട് നൽകി പരിശീലനം നൽകിയവർ. രണ്ട്, ഇവരുടെ സ്വാധീനത്തിൽ വീണുപോയ ‘നിഷ്കളങ്കരായ’ യുവാക്കൾ.
സർക്കാർ സേന കെട്ടിടങ്ങൾക്ക് മുകളിൽ നിന്നും മറ്റും പ്രതിഷേധക്കാർക്ക് നേരെ വെടിയുതിർത്തതായും സൈനിക ഡ്രോണുകൾ ഉപയോഗിച്ച് നിരീക്ഷണം നടത്തിയതായും ദൃക്സാക്ഷികൾ പറഞ്ഞു. പലരെയും മുഖത്ത് ലക്ഷ്യം വെച്ചാണ് വെടിവെച്ചതെന്നും അവർ ആരോപിക്കുന്നു.
പ്രതിഷേധങ്ങളെ അടിച്ചമർത്താൻ ഖമേനി തന്നെ രൂപീകരിച്ച പാരാമിലിറ്ററി ഗ്രൂപ്പായ ‘ബസിജ്’ മോട്ടോർ ബൈക്കുകളിൽ എത്തി ആക്രമണം നടത്തിയതായും റിപ്പോർട്ടുകളുണ്ട്.
സാമ്പത്തിക തകർച്ചയിൽ പ്രതിഷേധിച്ച് ഡിസംബർ അവസാനം ആരംഭിച്ച പ്രക്ഷോഭമാണ് ഇപ്പോൾ രക്തരൂക്ഷിതമായ ആഭ്യന്തര സംഘർഷമായി മാറിയിരിക്കുന്നത്. വിദേശ ഏജന്റുകളാണ് ഇതിന് പിന്നിലെന്ന് ഇറാൻ ഭരണകൂടം ആവർത്തിക്കുന്നുണ്ടെങ്കിലും ഇതിന് കൃത്യമായ തെളിവുകൾ ഹാജരാക്കാൻ അവർക്ക് കഴിഞ്ഞിട്ടില്ല.
