തിരുവനന്തപുരം: റിബല് സ്റ്റാര് പ്രഭാസിനെ നായകനാക്കി സന്ദീപ് റെഡ്ഡി വംഗ സംവിധാനം ചെയ്യുന്ന ബ്രഹ്മാണ്ഡ ചിത്രം ‘സ്പിരിറ്റ്’ 2027 മാര്ച്ച് അഞ്ചിന് തിയേറ്ററുകളിലെത്തും. പ്രഭാസിന്റെ കരിയറിലെ ഇരുപത്തിയഞ്ചാമത്തെ ചിത്രമെന്ന പ്രത്യേകതയോടെ എത്തുന്ന ഈ ചിത്രം ടി-സീരീസ്, ഭദ്രകാളി പിക്ചേഴ്സ് എന്നിവയുടെ ബാനറില് ഭൂഷണ് കുമാറും പ്രണയ് റെഡ്ഡി വംഗയും ചേര്ന്നാണ് നിര്മ്മിക്കുന്നത്. ചിത്രത്തില് പ്രഭാസ് ഒരു കരുത്തുറ്റ പോലീസ് ഉദ്യോഗസ്ഥനായാണ് വേഷമിടുന്നത്.
തൃപ്തി ദിമ്രി നായികയാകുന്ന ഈ ചിത്രത്തില് വിവേക് ഒബ്റോയ്, പ്രകാശ് രാജ് തുടങ്ങിയ വമ്പന് താരനിരയും അണിനിരക്കുന്നുണ്ട്. ആനിമല്, അര്ജുന് റെഡ്ഡി തുടങ്ങിയ ഹിറ്റുകള്ക്ക് ശേഷം സന്ദീപ് വംഗ ഒരുക്കുന്ന ചിത്രം എന്ന നിലയില് ആരാധകര്ക്കിടയില് വലിയ പ്രതീക്ഷയാണ് സ്പിരിറ്റ് ഉയര്ത്തിയിരിക്കുന്നത്.
അതേസമയം, പ്രഭാസ് നായകനായി നിലവില് തിയേറ്ററുകളില് ഓടുന്ന ‘രാജാ സാബ്’ കേരളത്തില് സമ്മിശ്ര പ്രതികരണമാണ് നേടിവരുന്നത്. മാരുതി സംവിധാനം ചെയ്ത ഈ ഹൊറര്-കോമഡി ചിത്രം ജനുവരി 9-ന് ആണ് റിലീസ് ചെയ്തത്. പ്രഭാസിന്റെ സ്റ്റൈലിഷ് ലുക്കും ചിത്രത്തിലെ കോമഡി രംഗങ്ങളും തെലുങ്ക് ആരാധകര്ക്കിടയില് വലിയ ചര്ച്ചയായിട്ടുണ്ട്.
റിലീസ് ചെയ്ത് ആദ്യ ആഴ്ചയ്ക്കുള്ളില് തന്നെ ചിത്രം 130 കോടിയിലധികം രൂപ കളക്ഷന് നേടി ബോക്സ് ഓഫീസില് കരുത്ത് തെളിയിച്ചു കഴിഞ്ഞു. ഹൊറര് ഫാന്റസി പശ്ചാത്തലത്തില് ഒരുക്കിയിരിക്കുന്ന ഈ സിനിമയില് മാളവിക മോഹനന്, നിധി അഗര്വാള്, സഞ്ജയ് ദത്ത് എന്നിവരും പ്രധാന വേഷങ്ങള് കൈകാര്യം ചെയ്യുന്നു.
സ്പിരിറ്റിന് പുറമെ പ്രഭാസിന്റേതായി നിരവധി വമ്പന് പ്രോജക്റ്റുകളാണ് വരും വര്ഷങ്ങളില് റിലീസിന് തയ്യാറെടുക്കുന്നത്. ബോക്സോഫീസില് തരംഗമായ ചിത്രങ്ങളുടെ രണ്ടാം ഭാഗങ്ങളും പ്രഭാസിന്റേതായി അണിയറയില് ഒരുങ്ങുന്നുണ്ട്. നാഗ് അശ്വിന് സംവിധാനം ചെയ്യുന്ന സയന്സ് ഫിക്ഷന് ഐതിഹ്യ ചിത്രം ‘കല്ക്കി 2898 എഡി’യുടെ രണ്ടാം ഭാഗവും ഉടന് ചിത്രീകരണം ആരംഭിക്കാനിരിക്കുകയാണ്. കല്ക്കി രണ്ടാം ഭാഗത്തിന്റെ ഷൂട്ടിംഗ് 2026 ഫെബ്രുവരിയില് തുടങ്ങുമെന്നാണ് റിപ്പോര്ട്ടുകള് സൂചിപ്പിക്കുന്നത്.
തുടര്ച്ചയായ ബിഗ് ബജറ്റ് ചിത്രങ്ങളിലൂടെ ഇന്ത്യന് സിനിമയിലെ തന്റെ പാന്-ഇന്ത്യന് ആധിപത്യം ഉറപ്പിക്കുകയാണ് പ്രഭാസ്.
Prabhas-starrer Spirit will hit theaters on March 5th.
