വാഷിംഗ്ടൺ: അമേരിക്കൻ ഒളിമ്പിക് താരം ഹണ്ടർ ഹെസിനെതിരെ പ്രസിഡന്റ് ഡോണാൾഡ് ട്രംപ് നടത്തിയ പരാമർശം വലിയ വിവാദമാകുന്നു. നിലവിലെ രാഷ്ട്രീയ സാഹചര്യത്തിൽ അമേരിക്കയെ പ്രതിനിധീകരിക്കുന്നതിൽ ആശങ്കയുണ്ടെന്ന് ഹെസ് കഴിഞ്ഞ ആഴ്ച വാർത്താ സമ്മേളനത്തിൽ പറഞ്ഞിരുന്നു. ഇതിനെതിരെയാണ് “ഹണ്ടർ ഹെസ് ഒരു യഥാർത്ഥ തോൽവിയാണെന്ന്” ട്രംപ് തന്റെ സോഷ്യൽ മീഡിയ പ്ലാറ്റ്ഫോമായ ട്രൂത്ത് സോഷ്യലിലൂടെ പരിഹസിച്ചത്.
താൻ രാജ്യത്തെ പ്രതിനിധീകരിക്കുന്നില്ല എന്നാണ് ഹെസ് പറയുന്നത് എന്നായിരുന്നു ട്രംപിന്റെ ആരോപണം. എന്നാൽ, ട്രംപിന്റെ ഈ കടന്നാക്രമണത്തിനെതിരെ അമേരിക്കയുടെ പ്രമുഖ സ്നോബോർഡിംഗ് താരം ക്ലോയി കിം ശക്തമായി രംഗത്തെത്തി. രാജ്യത്തെ പ്രതിനിധീകരിക്കുന്നതിൽ താൻ അഭിമാനിക്കുന്നുണ്ടെങ്കിലും, ഇത്തരം സാഹചര്യങ്ങളിൽ സ്നേഹത്തോടും കരുണയോടും കൂടിയാണ് നാം ഇടപെടേണ്ടതെന്ന് ക്ലോയി കിം വ്യക്തമാക്കി.
തന്റെ മാതാപിതാക്കൾ കുടിയേറ്റക്കാരാണെന്ന വസ്തുത ചൂണ്ടിക്കാട്ടി, ഇത്തരം വ്യക്തിപരമായ അധിക്ഷേപങ്ങൾ തന്നെയും ബാധിക്കുന്നുണ്ടെന്ന് ക്ലോയി പറഞ്ഞു. ലോകം ഒരുപാട് പ്രതിസന്ധികളിലൂടെ കടന്നുപോകുമ്പോൾ പരസ്പരം വിഭജിക്കുന്നതിന് പകരം ഒരുമിച്ചു നിൽക്കുകയും മറ്റുള്ളവർക്കായി ശബ്ദമുയർത്തുകയുമാണ് വേണ്ടതെന്ന് താരം ഓർമ്മിപ്പിച്ചു. രാജ്യത്തെ രാഷ്ട്രീയ കലുഷിതമായ അന്തരീക്ഷത്തെക്കുറിച്ച് ഹണ്ടർ ഹെസ് പങ്കുവെച്ച ആശങ്കകൾക്ക് പിന്തുണ പ്രഖ്യാപിക്കുന്നതായിരുന്നു ക്ലോയി കിമ്മിന്റെ പ്രതികരണം.
