അമേരിക്കൻ ആക്രമണ ഭീഷണി നിലനിൽക്കുന്ന സാഹചര്യത്തിൽ ഇറാന് ശക്തമായ പിന്തുണയുമായി റഷ്യയും ചൈനയും രംഗത്തെത്തി. തന്ത്രപ്രധാനമായ ഹോർമൂസ് കടലിടുക്കിൽ മൂന്ന് രാജ്യങ്ങളും ചേർന്ന് ‘മാരിടൈം സെക്യൂരിറ്റി ബെൽറ്റ് 2026’ എന്ന പേരിൽ വിപുലമായ നാവികാഭ്യാസം ആരംഭിച്ചു. മേഖലയിൽ അമേരിക്കയും ഇസ്രായേലും സൈനിക സന്നാഹം വർധിപ്പിക്കുന്നതിനിടയിലാണ് ഇറാന്റെ കരുത്ത് വിളിച്ചോതുന്ന ഈ സൈനിക നീക്കം. ഗൾഫ് മേഖലയിലെ എണ്ണ വിതരണത്തിന്റെ പ്രധാന പാതയായ ഹോർമൂസ് കടലിടുക്ക് ഭാഗികമായി അടച്ചുകൊണ്ടാണ് ഇറാൻ മിസൈൽ പരീക്ഷണങ്ങൾ ഉൾപ്പെടെയുള്ള അഭ്യാസങ്ങൾ നടത്തുന്നത്.
ഇറാനെതിരായ ഏതൊരു സൈനിക നീക്കവും ‘തീക്കളിയായിരിക്കും’ എന്ന് റഷ്യൻ വിദേശകാര്യ മന്ത്രി സെർജി ലാവ്റോവ് കടുത്ത മുന്നറിയിപ്പ് നൽകി. മേഖലയിൽ യുദ്ധം ആഗ്രഹിക്കുന്നില്ലെന്നും എന്നാൽ ആക്രമണമുണ്ടായാൽ പ്രത്യാഘാതം ഗുരുതരമായിരിക്കുമെന്നും അദ്ദേഹം വ്യക്തമാക്കി. റഷ്യയുടെ ബാൾട്ടിക് ഫ്ലീറ്റിലെ പടക്കപ്പലുകളും ചൈനയുടെ അത്യാധുനിക ഗൈഡഡ് മിസൈൽ ഡിസ്ട്രോയറുകളും അഭ്യാസത്തിൽ പങ്കെടുക്കുന്നുണ്ട്. അന്താരാഷ്ട്ര ആണവോർജ്ജ ഏജൻസിയുമായി ഇറാൻ ചർച്ചകൾ നടത്തുന്നതിനിടെയാണ് സഖ്യശക്തികളുടെ ഈ ശക്തിപ്രകടനം.
മിഡിൽ ഈസ്റ്റിലെ സംഘർഷ സാധ്യത കണക്കിലെടുത്ത് അമേരിക്ക തങ്ങളുടെ അത്യാധുനിക പടക്കപ്പലായ യു.എസ്.എസ് ജെറാൾഡ് ഫോർഡ് മേഖലയിലേക്ക് അയച്ചിട്ടുണ്ട്. ഇസ്രായേൽ തീരത്ത് നിലയുറപ്പിക്കുന്ന ഈ കപ്പൽ ഇറാന്റെ ഭാഗത്തുനിന്നുള്ള തിരിച്ചടികളെ പ്രതിരോധിക്കാനാണ് ലക്ഷ്യമിടുന്നത്. എന്നാൽ റഷ്യയുടെയും ചൈനയുടെയും നേരിട്ടുള്ള സാന്നിധ്യം അമേരിക്കൻ നീക്കങ്ങൾക്ക് വലിയ വെല്ലുവിളിയാകും. മേഖലയിൽ സമാധാനം നിലനിർത്താൻ ചർച്ചകൾ തുടരണമെന്ന് അറബ് രാജ്യങ്ങളും ഇതിനോടകം ആവശ്യപ്പെട്ടിട്ടുണ്ട്.
