ഡമാസ്കസ്: ഇറാഖ്, ജോർദാൻ അതിർത്തികൾക്ക് സമീപമുള്ള തന്ത്രപ്രധാനമായ അൽ-തൻഫ് സൈനിക താവളത്തിന്റെ നിയന്ത്രണം സിറിയൻ സൈന്യം ഏറ്റെടുത്തു. വർഷങ്ങളായി ഇവിടെ നിലയുറപ്പിച്ചിരുന്ന അമേരിക്കൻ സൈന്യം പിന്മാറിയതിനെത്തുടർന്നാണ് സിറിയൻ പ്രതിരോധ മന്ത്രാലയം ഇക്കാര്യം അറിയിച്ചത്.
വ്യാഴാഴ്ച പുറത്തിറക്കിയ പ്രസ്താവന പ്രകാരം, അമേരിക്കൻ പക്ഷവുമായുള്ള ഏകോപനത്തിലൂടെയാണ് സിറിയൻ അറബ് ആർമി യൂണിറ്റുകൾ അൽ-തൻഫ് താവളത്തിന്റെയും പരിസര പ്രദേശങ്ങളുടെയും സുരക്ഷ ഏറ്റെടുത്തത്. സിറിയ-ഇറാഖ്-ജോർദാൻ അതിർത്തികളിൽ സൈന്യത്തെ വിന്യസിച്ചു തുടങ്ങിയതായും വരും ദിവസങ്ങളിൽ കൂടുതൽ അതിർത്തി രക്ഷാസേനയെ നിയമിക്കുമെന്നും മന്ത്രാലയം വ്യക്തമാക്കി.
2014-ൽ സിറിയൻ ആഭ്യന്തരയുദ്ധകാലത്ത് ഐസിസിനെതിരെയുള്ള (ISIL) പോരാട്ടത്തിന്റെ പ്രധാന കേന്ദ്രമായാണ് ഈ ബേസ് സ്ഥാപിക്കപ്പെട്ടത്.
ഒരുകാലത്ത് യുഎസ് ‘ആഗോള ഭീകരൻ’ എന്ന് വിശേഷിപ്പിച്ചിരുന്ന, ഹയാത്ത് തഹ്രീർ അൽ-ഷാം മുൻ നേതാവും നിലവിലെ സിറിയൻ പ്രസിഡന്റുമായ അഹമ്മദ് അൽ-ഷാറ കഴിഞ്ഞ നവംബറിൽ ഐസിസ് വിരുദ്ധ സഖ്യത്തിൽ ചേർന്നത് വലിയ രാഷ്ട്രീയ മാറ്റങ്ങൾക്ക് വഴിവെച്ചു.
പിന്മാറ്റത്തെക്കുറിച്ച് യുഎസ് സൈന്യം ഔദ്യോഗികമായി പ്രതികരിച്ചിട്ടില്ലെങ്കിലും, സിറിയയിൽ നിന്ന് സൈന്യത്തെ പിൻവലിക്കാൻ തനിക്ക് താൽപ്പര്യമുണ്ടെന്ന് പ്രസിഡന്റ് ട്രംപ് നേരത്തെ തന്നെ വ്യക്തമാക്കിയിരുന്നു.
