കീവ്: യുക്രൈനും റഷ്യയും തമ്മിലുള്ള സമാധാന കരാർ ഈ വർഷം ജൂൺ മാസത്തോടെ പൂർത്തിയാക്കാൻ അമേരിക്ക ലക്ഷ്യമിടുന്നതായി യുക്രൈൻ പ്രസിഡന്റ് വൊളോഡിമിർ സെലെൻസ്കി. ശനിയാഴ്ച പ്രസിദ്ധീകരിച്ച പ്രസ്താവനയിലാണ് സെലെൻസ്കി ഇക്കാര്യം വ്യക്തമാക്കിയത്. ജൂൺ മാസത്തിനുള്ളിൽ യുദ്ധം അവസാനിപ്പിക്കാനാവശ്യമായ എല്ലാ നടപടികളും സ്വീകരിക്കാനാണ് അമേരിക്കൻ ഭരണകൂടം ആഗ്രഹിക്കുന്നത്. കൃത്യമായ ഒരു സമയക്രമം ഇതിനായി വാഷിംഗ്ടൺ മുന്നോട്ടുവെച്ചിട്ടുണ്ട്.
അടുത്ത ഒരാഴ്ചയ്ക്കുള്ളിൽ അമേരിക്കയിലെ മയാമിയിൽ വെച്ച് യുക്രൈൻ-റഷ്യ പ്രതിനിധികളുടെ സംയുക്ത ചർച്ചയ്ക്ക് അമേരിക്ക നിർദ്ദേശിച്ചിട്ടുണ്ട്. ഇതിൽ പങ്കെടുക്കുമെന്ന് യുക്രൈൻ ഔദ്യോഗികമായി സ്ഥിരീകരിച്ചു. സമാധാന ചർച്ചകൾ സജീവമാണെങ്കിലും, പിടിച്ചെടുത്ത ഭൂമി വിട്ടുനൽകുന്ന കാര്യത്തിൽ ഇരുരാജ്യങ്ങളും ഇപ്പോഴും വിട്ടുവീഴ്ചയ്ക്ക് തയ്യാറായിട്ടില്ല. ഡോൺബാസ് പ്രദേശം പൂർണ്ണമായും വിട്ടുനൽകണമെന്നാണ് റഷ്യയുടെ ആവശ്യം. എന്നാൽ നിലവിലെ മുൻനിര അടിസ്ഥാനമാക്കിയുള്ള വെടിനിർത്തലിനെയാണ് യുക്രൈൻ അനുകൂലിക്കുന്നത്.
ഒരു വെടിനിർത്തൽ കരാറിൽ എത്തിയാൽ അത് കൃത്യമായി പാലിക്കപ്പെടുന്നുണ്ടോ എന്ന് നിരീക്ഷിക്കാൻ അമേരിക്ക ഗ്യാരണ്ടി നൽകുമെന്ന് അബുദാബിയിൽ നടന്ന ചർച്ചകളിൽ ഉറപ്പുനൽകിയിട്ടുണ്ട്. 2026 നവംബറിൽ നടക്കാനിരിക്കുന്ന അമേരിക്കൻ മിഡ്ടേം തിരഞ്ഞെടുപ്പിന് മുൻപായി ഈ വലിയ ആഗോള പ്രശ്നം പരിഹരിച്ച് രാഷ്ട്രീയ വിജയം നേടുക എന്നതാണ് ട്രംപ് ഭരണകൂടത്തിന്റെ ലക്ഷ്യമെന്ന് നിരീക്ഷകർ കരുതുന്നു. ജൂണിനുള്ളിൽ കരാർ ഒപ്പിട്ടില്ലെങ്കിൽ ഇരുരാജ്യങ്ങൾക്കും മേൽ അമേരിക്ക കൂടുതൽ കടുത്ത സമ്മർദ്ദം ചെലുത്തുമെന്നും സെലെൻസ്കി സൂചിപ്പിച്ചു.
