ലണ്ടൻ: നോർത്ത് അറ്റ്ലാന്റിക് ട്രീറ്റി ഓർഗനൈസേഷൻ എന്ന സൈനിക സഖ്യത്തെ ‘പേപ്പർ ടൈഗർ’ എന്ന് വിശേഷിപ്പിച്ച അമേരിക്കൻ പ്രസിഡന്റ് ഡോണൾഡ് ട്രംപിന് മറുപടിയുമായി ബ്രിട്ടീഷ് പ്രധാനമന്ത്രി കീർ സ്റ്റാർമർ. ലോകം കണ്ടിട്ടുള്ളതിൽ വച്ച് ഏറ്റവും ഫലപ്രദമായ സൈനിക സഖ്യമാണ് നാറ്റോ എന്ന് അദ്ദേഹം വിശേഷിപ്പിച്ചു. പതിറ്റാണ്ടുകളായി തങ്ങളുടെ സുരക്ഷ ഉറപ്പാക്കുന്നത് ഈ സഖ്യമാണെന്നും അദ്ദേഹം ഓർമ്മിപ്പിച്ചു.
വാർത്താസമ്മേളനത്തിലാണ് സ്റ്റാർമർ തന്റെ നിലപാട് വ്യക്തമാക്കിയത്. നാറ്റോയിൽ നിന്നുള്ള അമേരിക്കയുടെ പിന്മാറ്റത്തെക്കുറിച്ചുള്ള ട്രംപിന്റെ പ്രസ്താവനകൾക്കിടയിലും, ബ്രിട്ടന്റെ ദേശീയ താൽപ്പര്യങ്ങൾ സംരക്ഷിക്കാനാണ് താൻ മുൻഗണന നൽകുന്നതെന്ന് അദ്ദേഹം പറഞ്ഞു. “എനിക്ക് മേൽ എന്ത് സമ്മർദ്ദമുണ്ടായാലും, എത്ര വലിയ ശബ്ദമുയർന്നാലും, ബ്രിട്ടന്റെ താൽപ്പര്യങ്ങൾക്കായിരിക്കും ഞാൻ മുൻതൂക്കം നൽകുക. അതുകൊണ്ടാണ് ഇത് ഞങ്ങളുടെ യുദ്ധമല്ലെന്നും ഇതിലേക്ക് ഞങ്ങൾ വലിച്ചിഴയ്ക്കപ്പെടില്ലെന്നും ഞാൻ ആവർത്തിക്കുന്നത്,” സ്റ്റാർമർ പറഞ്ഞു.
പ്രതിരോധം, സുരക്ഷ, സാമ്പത്തിക ഭാവി എന്നിവയ്ക്കായി യൂറോപ്പുമായി കൂടുതൽ അടുത്ത ബന്ധം സ്ഥാപിക്കേണ്ടത് അത്യാവശ്യമാണെന്നും അദ്ദേഹം കൂട്ടിച്ചേർത്തു. നേരത്തെ ‘ദി ടെലിഗ്രാഫിന്’ നൽകിയ അഭിമുഖത്തിൽ ബ്രിട്ടീഷ് നാവികസേനയെ ട്രംപ് പരിഹസിച്ചിരുന്നു. ബ്രിട്ടന് സ്വന്തമായി ഒരു നേവി പോലുമില്ലെന്നും, പ്രവർത്തിക്കാത്ത വിമാനവാഹിനിക്കപ്പലുകളാണ് ബ്രിട്ടന്റേതെന്നും ട്രംപ് ആരോപിച്ചിരുന്നു. ഇറാൻ യുദ്ധത്തിൽ ബ്രിട്ടൻ നേരിട്ട് പങ്കെടുക്കാത്തതിലുള്ള അതൃപ്തിയാണ് ട്രംപിന്റെ പരിഹാസത്തിന് പിന്നിലെന്നാണ് വിലയിരുത്തപ്പെടുന്നത്. എന്നാൽ, സഖ്യകക്ഷികളുമായുള്ള ബന്ധം കാത്തുസൂക്ഷിക്കുമ്പോഴും നേരിട്ടുള്ള യുദ്ധത്തിന് ഇല്ലെന്ന ഉറച്ച നിലപാടിലാണ് ബ്രിട്ടൻ.
