ബ്രസൽസ്: ഇറാനിലെ ഊർജ്ജ നിലയങ്ങളും സിവിലിയൻ കേന്ദ്രങ്ങളും ലക്ഷ്യം വെച്ചുള്ള നീക്കങ്ങൾ അംഗീകരിക്കാനാവില്ലെന്നും അത് അന്താരാഷ്ട്ര നിയമങ്ങളുടെ ലംഘനമാണെന്നും യൂറോപ്യൻ കൗൺസിൽ പ്രസിഡന്റ് അന്റോണിയോ കോസ്റ്റ. ഹോർമുസ് കടലിടുക്ക് തുറന്നുകൊടുത്തില്ലെങ്കിൽ ചൊവ്വാഴ്ച ഇറാന്റെ വൈദ്യുതി നിലയങ്ങളും പാലങ്ങളും തകർക്കുമെന്ന അമേരിക്കൻ പ്രസിഡന്റ് ഡൊണാൾഡ് ട്രംപിന്റെ വിവാദ പരാമർശത്തിന് പിന്നാലെയാണ് യൂറോപ്യൻ യൂണിയന്റെ ഈ കർശനമായ ഇടപെടൽ.
ട്രംപിന്റെ പേര് നേരിട്ട് പരാമർശിക്കാതെയാണ് സിവിലിയൻ അടിസ്ഥാന സൗകര്യങ്ങൾക്ക് നേരെയുള്ള ആക്രമണങ്ങൾ “നിയമവിരുദ്ധവും അസ്വീകാര്യവുമാണെന്ന്” കോസ്റ്റ വ്യക്തമാക്കിയത്. ഇറാനിലെ സാധാരണ ജനങ്ങളാണ് നിലവിലെ ഭരണകൂടത്തിന്റെ പ്രധാന ഇരകളെന്നും, സൈനിക നടപടികൾ വ്യാപിപ്പിക്കുന്നത് അവരെ കൂടുതൽ ദുരിതത്തിലാക്കുമെന്നും കോസ്റ്റ എക്സ് പ്ലാറ്റ്ഫോമിൽ കുറിച്ചു. പവർ പ്ലാന്റുകൾ പോലുള്ള ജനവാസ കേന്ദ്രങ്ങളിലെ സൗകര്യങ്ങൾ തകർക്കുന്നത് യുദ്ധക്കുറ്റത്തിന്റെ പരിധിയിൽ വരുമെന്ന് നിയമവിദഗ്ധരും മുന്നറിയിപ്പ് നൽകുന്നുണ്ട്.
അതേസമയം, അയൽരാജ്യങ്ങളിലെ ഊർജ്ജ കേന്ദ്രങ്ങൾക്ക് നേരെ ഇറാൻ നടത്തുന്ന ആക്രമണങ്ങൾ അവസാനിപ്പിക്കണമെന്നും ഹോർമുസ് കടലിടുക്കിലൂടെയുള്ള കപ്പൽ ഗതാഗതത്തിന് പൂർണ്ണ സ്വാതന്ത്ര്യം അനുവദിക്കണമെന്നും യൂറോപ്യൻ യൂണിയൻ ഇറാനോട് ആവശ്യപ്പെട്ടു. ലോകമെമ്പാടുമുള്ള ഊർജ്ജ വിപണിയെയും സാധാരണക്കാരുടെ ജീവിതത്തെയും ബാധിക്കുന്ന തരത്തിലുള്ള നീക്കങ്ങളിൽ നിന്ന് ഇരുപക്ഷവും പിന്തിരിയണമെന്നാണ് യൂറോപ്പിന്റെ നിലപാട്. വരും മണിക്കൂറുകളിൽ ട്രംപ് എന്ത് തീരുമാനമെടുക്കുമെന്നത് ആഗോളതലത്തിൽ വലിയ ഉത്കണ്ഠയ്ക്ക് കാരണമായിട്ടുണ്ട്.
