ഇസ്ലാമാബാദ്: പാകിസ്ഥാനിൽ നടന്ന 21 മണിക്കൂർ നീണ്ട നിർണ്ണായക ചർച്ചകളിൽ അമേരിക്കയ്ക്ക് ഇറാന്റെ വിശ്വാസം നേടിയെടുക്കാൻ കഴിഞ്ഞില്ലെന്ന് ഇറാൻ പ്രതിനിധി സംഘത്തലവൻ മുഹമ്മദ് ബാഗർ ഗാലിബാഫ്. ചർച്ചകൾക്ക് ശേഷം എക്സ് പ്ലാറ്റ്ഫോമിലൂടെയാണ് അദ്ദേഹം നിലപാട് വ്യക്തമാക്കിയത്. മുൻപുണ്ടായ രണ്ട് യുദ്ധങ്ങളുടെ അനുഭവ പശ്ചാത്തലത്തിൽ അമേരിക്കയെ വിശ്വസിക്കാൻ തങ്ങൾക്ക് കഴിയില്ലെന്നും ഗാലിബാഫ് കൂട്ടിച്ചേർത്തു.
സമാധാനത്തിനായി ഇറാൻ പ്രതിനിധികൾ 168 നിർമ്മാണാത്മകമായ നിർദ്ദേശങ്ങൾ മേശപ്പുറത്ത് വെച്ചിരുന്നു. എന്നാൽ ഈ നിർദ്ദേശങ്ങളോട് ക്രിയാത്മകമായി പ്രതികരിക്കാനോ ഇറാന്റെ ആത്മവിശ്വാസം നേടിയെടുക്കാനോ അമേരിക്കൻ പക്ഷത്തിന് കഴിഞ്ഞില്ല. ഇറാന്റെ തത്വങ്ങളും യുക്തിയും അമേരിക്കയ്ക്ക് ഇപ്പോൾ വ്യക്തമായിട്ടുണ്ടാകുമെന്നും, ഇനി തങ്ങളുടെ വിശ്വാസം നേടിയെടുക്കണോ വേണ്ടയോ എന്ന് തീരുമാനിക്കേണ്ടത് വാഷിംഗ്ടണാണെന്നും അദ്ദേഹം പറഞ്ഞു.
ഇറാൻ പാർലമെന്റ് സ്പീക്കറും ഭരണകൂടത്തിലെ മുതിർന്ന നേതാവുമായ ഗാലിബാഫ്, നയതന്ത്രത്തെ സൈനിക പോരാട്ടത്തിന്റെ മറ്റൊരു രൂപമായാണ് വിശേഷിപ്പിച്ചത്. “ഇറാൻ ജനതയുടെ അവകാശങ്ങൾ സംരക്ഷിക്കാനുള്ള മറ്റൊരു മാർഗ്ഗമാണ് നയതന്ത്രം. 40 ദിവസം നീണ്ടുനിന്ന ദേശീയ പ്രതിരോധത്തിലൂടെ നേടിയെടുത്ത നേട്ടങ്ങൾ സംരക്ഷിക്കുന്നതിൽ നിന്ന് ഞങ്ങൾ പിന്നോട്ടില്ല,” അദ്ദേഹം വ്യക്തമാക്കി. ചർച്ചകൾ പരാജയപ്പെട്ടതോടെ പശ്ചിമേഷ്യയിലെ താൽക്കാലിക വെടിനിർത്തൽ എത്രനാൾ തുടരുമെന്ന കാര്യത്തിൽ വീണ്ടും ആശങ്ക ഉടലെടുത്തിരിക്കുകയാണ്. ഇറാന്റെ കടുത്ത നിലപാടുകൾ വരും ദിവസങ്ങളിൽ മേഖലയിൽ പുതിയ പ്രതിസന്ധികൾക്ക് കാരണമായേക്കാം.
