പാരീസ്: പശ്ചിമേഷ്യയിൽ സമുദ്രയാത്രാ സ്വാതന്ത്ര്യത്തിന് വെല്ലുവിളി ഉയർത്തുന്നവർക്കെതിരെ ശക്തമായ നടപടികൾ സ്വീകരിക്കുന്നതിനായി യൂറോപ്യൻ യൂണിയൻ ഉപരോധ ചട്ടക്കൂടുകളിൽ നിർണായക ഭേദഗതി വരുത്തി. റഷ്യയുടെ യുക്രെയ്ൻ അധിനിവേശത്തിന് ടെഹ്റാൻ നൽകുന്ന പിന്തുണയെ ചെറുക്കാനായി രൂപീകരിച്ചിരുന്ന ഉപരോധ വ്യവസ്ഥകളിലാണ്, മിഡിൽ ഈസ്റ്റിലെ നിലവിലെ സാഹചര്യങ്ങൾ കൂടി പരിഗണിച്ചുകൊണ്ട് ഇയു ഇപ്പോൾ മാറ്റങ്ങൾ വരുത്തിയിരിക്കുന്നത്.
ഹോർമുസ് കടലിടുക്കിലെ സ്വതന്ത്രമായ കപ്പൽ ഗതാഗതത്തെ തടസ്സപ്പെടുത്തുന്ന തരത്തിലുള്ള ഇറാന്റെ നീക്കങ്ങൾക്ക് മറുപടിയായി കൂടുതൽ കർശനമായ നിയന്ത്രണങ്ങൾ ഏർപ്പെടുത്താൻ ഈ പുതിയ ഭേദഗതിയിലൂടെ യൂറോപ്യൻ യൂണിയന് സാധിക്കുമെന്ന് യൂറോപ്യൻ കൗൺസിൽ വ്യക്തമാക്കുകയായിരുന്നു. ഇതിന്റെ ഭാഗമായി ഈ പ്രതിസന്ധിക്ക് പിന്നിൽ പ്രവർത്തിക്കുന്ന വ്യക്തികൾക്കും സ്ഥാപനങ്ങൾക്കുമെതിരെ യാത്രാ വിലക്കുകളും യൂറോപ്പിലുള്ള അവരുടെ ആസ്തികൾ മരവിപ്പിക്കലും ഉൾപ്പെടെയുള്ള കടുത്ത നടപടികൾ ഉടൻ ഉണ്ടാകും.
കഴിഞ്ഞ ഫെബ്രുവരി അവസാനത്തോടെ ആരംഭിച്ച യുഎസ്-ഇസ്രായേൽ-ഇറാൻ യുദ്ധത്തെത്തുടർന്ന് തന്ത്രപ്രധാനമായ ഹോർമുസ് ജലപാത പൂർണ്ണമായും അടച്ചിട്ടിരിക്കുകയാണ്. കപ്പൽ ഗതാഗതം പുനരാരംഭിക്കാൻ അന്താരാഷ്ട്ര തലത്തിൽ കടുത്ത സമ്മർദ്ദം തുടരുന്നതിനിടയിലും, കഴിഞ്ഞ 24 മണിക്കൂറിനുള്ളിൽ 35 കപ്പലുകൾ മാത്രമാണ് കടലിടുക്കിലൂടെ കടന്നുപോയതെന്ന് ഇറാൻ ഒദ്യോഗികമായി വ്യക്തമാക്കിയിട്ടുണ്ട്. യൂറോപ്യൻ യൂണിയന്റെ ഈ പുതിയ ഉപരോധ നീക്കം പശ്ചിമേഷ്യൻ പ്രതിസന്ധിയിലെ സാമ്പത്തിക-രാഷ്ട്രീയ യുദ്ധം കൂടുതൽ സങ്കീർണ്ണമാക്കുമെന്നാണ് വിലയിരുത്തപ്പെടുന്നത്.
